Со наслов „Фантазија“, традиционалниот концерт на отворено на Македонската филхармонија ќе се одржи на 13 јуни, со почеток во 20:30 часот, во Градски парк во Скопје. На програмата е музика од анимирани филмови од продукцијата на „Дизни“, а диригент е Тимоти Редмонд од Велика Британија. Како солисти ќе настапат сопранистката Биљана Јосифов, тенорот Денис Димоски и бас баритонот Иван Наумовски.

– Оваа година на концертот во Парк насловен „Фантазија“ ќе се изведе музика од најубавите анимирани филмови, преку избор на композиции од „Малечката сирена“, „Убавицата и ѕверот“, „Херкулес“, „Покахонтас“, „Аладин“, „Книга од џунглата“, „Снежно кралство“, „Кралот лав“, „Приказна за играчките“… Насловот на концертот е извлечен од истоимениот анимиран филм „Фантазија“ во кој дејствието се гради на осум класични музички дела во изведба на Филхармонискиот оркестар од Филаделфија под диригентската палка на Леополд Стоковски – истакна Мустафа Имери, директор на Македонската филхармонија, на прес-конференција што се одржа на 10 јуни по повод концертот.

Музичката изведба ќе биде надополнета и со видеофрагменти од филмовите и со специјално осветлување кое на публиката ќе ѝ понуди уште едно незаборавно доживување под отворено ѕвезедено небо со оркестарот на Македонската филхармонија.

Светот на Дизни е полн со фантазија и фантастична музика, истакнува диригентот Тимоти Редмонд од Велика Британија.

– Ова е музика која зборува со сите генерации, нѐ враќа во нашето детство. Сите сме ги гледале овие филмови, а сега ќе имаме можност да ја чуеме само музиката, преку феноменалната оркестрација и преку звукот на оркестарот и солистите. Уживаме во целиот проект, секоја композиција буди различни емоции, одлично течат пробите, ќе имаме одличен концерт во петок – рече Редмонд.

Солистите Биљана Јосифов и Иван Наумовски истакнуваат дека ова е уникатна можност да излезат од класичните рамки на оперското пеење и да се претстават пред публиката преку нов израз.

– Ние како оперски пејачи сиот израз, емоции и искуство го оставаме на сцена преку гласот. Песните не се воопшто едноставни за пеење, комплексни се, но во себе имаат една детска игривост која изнудува насмевки на нашите лица додека пееме – вели бас баритонот Наумовски.

– Се обидов да внесам и свој препознатлив печат во изведбата на композициите, и некои од нив ќе бидат изведени на оперски начин, малку поинаку од нивната автентична изведба која сме ја слушале во филмовите – вели сопранистката Биљана Јосифов.

Со концертот во Градски парк на 13 јуни, Македонската филхармонија ќе го заокружи официјалниот дел од оваа концертна сезона.

– По овој концерт, следува гостувањето на Македонската филхармонија во Солун, на 30 јуни, каде заедно со музичарите од Софиската и Солунската филхармонија уште еднаш ќе биде изведен заедничкиот проект; музичко-сценската кантата „Кармина Бурана“ од Карл Орф, која премиерно беше изведена во Софија во февруари годинава. Се надевам дека ќе можеме да ја повториме оваа наша заедничка изведба и во Скопје. По концертот во Солун, оркестарот ќе настапи на отворањето на фестивалот „Охридско лето“, на 12 јули со пијанистката Клер Хуангчи и диригентот Едвин Оутвотер од САД – најави директорот Мустафа Имери.