Под влијание на слабите жетви во Гана и Брегот на Слоновата Коска, цените на чоколадото нагло пораснаа на глобално ниво. Полска забележа раст од 39,1%, што е најголемо зголемување во ЕУ. Слабите жетви во Гана и Брегот на Слоновата Коска, најголемите производители на какао во светот, предизвикаа цената на чоколадото да скокне нагло низ целиот свет во текот на изминатата година.

Но, во која земја од Европската Унија потрошувачите го почувствуваа најголемото зголемување на цените? Полска го зазеде првото место, бидејќи во мај оваа година, во таа земја е забележано зголемување од 39,1% во споредба со истиот период од претходната година. Низ цела Европа, цените во мај беа во просек за 21,1% повисоки отколку претходната година, покажуваат податоците на Евростат.

Други земји кои забележаа значителни скокови на цените се Естонија (+37,9%), Литванија (+36,5%), Латвија (+33,2%), Шведска (+28,0%) и Финска (+26,0%), пишува euronews.

Од друга страна, растот на цените беше поблаг во Луксембург (+5,2%), Кипар (+9,0%), Италија (+12,0%), Малта (+12,2%) и Австрија (+13,4%). Какаото, кое порано се продаваше за помеѓу 2.000 и 3.000 евра по тон, достигна до 13.000 евра по тон во еден период.

Вистинска револуција на пазарот: Германците за првпат направија чоколадо без какао

Аналитичарите очекуваат цената да остане околу 9.000 евра до крајот на годината. Во текот на сезоната 2023/2024, глобалниот пазар на какао забележа пад на производството. Меѓународната организација за какао процени дека производството се намалило за околу 10% во споредба со претходната сезона.

Експертите го припишуваат овој недостиг на какао на различни фактори, вклучувајќи ги лошите временски услови – вклучувајќи интензивни врнежи од дожд проследени со подолги од вообичаените сушни сезони – климатските промени и болестите на земјоделските култури во Западна Африка- пренесе Н1.ба.