Kоалиција AA-А: Нови закони за децентрализација за нови полемики?
Алијанса на Албанците и Алтернатива кројат уште два нови закони за децентрализација и рамномерен регионален развој, кои можат да предизвикаат дебата и контроверзи во јавноста, дознава „Слободен печат“ од високи извори во двете опозициски партии.
– Станува збор за предлог Закон за реална функционалнa децентрализација, затоа што сметаме дека Македонија е најцентрализирана земја во Европа, и за Предлог-закон за рамномерен регионален развој, кој ќе биде подобар од овој кој е донесен во Собранието – вели изворот за „Слободен печат“.
На прашање за оваа тема кординаторот на пратеничката група на коалицијата Алијанса и Алтернативна Скендер Реџепи не ги демантира информациите, туку наведува дека во моментов се фокусирани на предлог-законот за државјанство.
– Во моментов се концентрираме на нацрт-законот за државјанство и на политичките проблеми што се јавуваат со блокирање на овој закон од страна на владата и македонската опозицијата. Додека, за други активности во Собранието во врска со нашите иницијативи за други законски измени, навремено ќе ве информираме – изјави Реџепи за „Слободен печат“.