Македонскиот писател за деца Киро Донев е добитник на наградата „Мала вила“ на 21. Меѓународен детски фестивал „Везени мост“, што оваа седмица се одржува во Тузла, Босна и Херцеговина. Наградата ја доделува Друштвото пријатели на книгата „Малиот принц“.

Писателот Донев наградата ја доби за босанскиот превод на неговата книга „Збркана сказна“. Оваа награда секоја година се доделува во рамките на фестивалот за „извонредност во книжевноста за деца“ и тоа на еден домашен (босански) автор за нова книга за деца на босански јазик и за странски автор преведен на босански јазик.

Покрај Донев, годинава наградата ја доби и босанскиот писател Исмет Бекриќ за книгата „Секој има своја бајка“. Двете книги се во издание на Институтот за детска книжевност на БиХ. Поговорите за босанското издание на „Збркана сказна“ ги напишаа Ана Витанова-Рингачева и Сузана Мицева. Наградите ќе се доделат во рамките на фестивалот, кој годинава трае од 16 до 19 октомври.

Книгата „Збркана сказна“ на македонски јазик ја објави „Македоника литера“. Романот за деца потоа излезе на српски јазик во едицијата на „Змаеви детски игри“ во Нови Сад, како и на турски јазик во Истанбул, Турција. Романот е преведен и објавен и во Бугарија и во Украина.

(Текстот е објавен во „Културен печат“ број 252, во печатеното издание на весникот „Слободен печат“ на 19-20.10.2024)