Два биолошки лека што ги нема на Клиниката за онкологија ќе бидат достапни неделава, а другите за 10 дена, изјави директорот на Фондот за здравство Сашо Клековски. Тој вели дека Клиниката за онкологија прави отпор и не сака да креира регистар на пациенти што имаат рак, со банален и неиздржан изговор – дека немало кој да ги запишува. Ова неодговорно поведение придонесува Фондот за здравство да нема увид на кого му се даваат биолошките терапии за кои одделува милионски суми.

Според Клековски, тоа што повеќе не се дозволува директорите да набавуваат лекови на реверс, но и тоа што се преминало од 2024 во 2025 година, направило недостиг со лековите – проблем кој вели дека не е финансиски туку организациски. Меѓутоа, лекови на реверс не се набавуваат на Онкологија уште од денот кога почна големата истрага на МВР и Јавното обвинителство, така што цела 2024 година лекови на реверс не се земаа во Клиниката за онкологија. Фондот за здравство не знае колку пациенти со рак има и колку терапија е потребна за нив.

-Сето тоа е ад-хок. И тоа ад-хок работење доведе до кривични пријави. Се надевам ќе резултираат во некаква одговорност. Ние мораме да воспоставиме регистар на пациенти со рак, како што има регистри и за ретки болести и за пациентите кои имаат дијабетес. Така соодветно ќе ги планираме и бројот на пациентите и количествата на лекови потребни. И онаму каде што нема да има лекови за сите, да бидат јасни и транспарентни критериумите кои пациенти ќе добијат лек а кои нема да добијат. Сакаме да воведеме регистри на лекови во сите медицински подрачја каде се употребуваат исклучително скапи лекови, значи и на Онкологија и на Хематологија и на Трансфузиологија. Тоа се клиники каде лекувањето на еден пациент може да чини десетици илјади евра годишно и мислам дека треба да биде и јасно и одговорно, рече Клековски.

Бидејќи Фондот значително ќе го зголеми буџетот за Клиниката за онкологија, за возврат очекува до јуни да се направи регистарот за се да биде транспарентно и да се знае каде одат лековите. На прашањето на „Слободен печат“ зошто се потребни 6 месеци за правење на ваков регистар со пациенти од карцином кога тоа претставува само аритметичко собирање на веќе достапни податоци, Клековски изјави дека „клиниките пружаат отпор“.

-Не е комплицирано да се направи регистар, ама има отпор, јасно ви е вас. Знаете од кого, од клиниките. Зошто клиниките прават отпор? Тоа нив ќе ги прашате. Ама класичното што го кажуваат е „дека нема кој да пополнува“. Ќе инсистирам да направат регистар. Не можеме да продолжиме да финансираме нешто што не е јасно и не е транспарентно, рече директорот Клековски.

Од петокот во Клиниката за онкологија поради несоодветно планирање на количините во исто време снема биолошка терапија од многу видови, што прави огромна разлика во исходот од болеста. Снема биолошка терапија од 5 лекови, тие што најмногу се користат на Клиниката – Atezolizumab (Tecentriq), Bevacizumab (Avastin), Palbociclib, Ribociclib, Fulvestrant, Cetuximab а постои голема можност во брзо време да снема Trastuzumab emtansine (Kadcyla), Nivolumab, Cobimetinib и Vemurafenib. Опозициската СДСМ преку соопштение ги повика Фондот и министерот за здравство Арбен Таравари да реагираат и да ги надминат проблемите. Таравари е во САД, на инаугурацијата на Доналд Трамп.

-Додека Тараври се шета се случува хаос во здравството – нема биолошка терапија. Додека министерот за здравство се шета по САД и објавува слики од рекламни паноа, пациентите на Клиниката за радиотерапија и онкологија се оставени без биолошка терапија. Ова е недозволиво и е уште еден доказ за неспособноста на владата на Мицкоски и министерот Таравари да се справи со елементарните потреби на граѓаните и здравствениот систем, рекоа од СДСМ.

Клековски пак, вели дека „СДСМ треба да се покријат со јорган и да молчат“ бидејќи сегашните проблеми се нивно масло.

-Значително зголемување на буџетот за 2025 година без јасно, транспарентно и одговорно работење нема шанса. Не може да продолжи како што било во минатото. СДСМ за ова прашање треба да се покрие под некој јорган и да молчат и да чекаат да помине ситуацијава. Сега се справуваме со хаосот направен претходно. Никогаш не сум се правдал со минатото, ама за 6 месеци не може да се справиме со набавки и реверси останати од минатото, рече Клековски.

Онколошките пациенти бараат биолошките лекови да бидат на позитивната листа итно, а не да се чека со години. Клековски прашува, како да се направи тоа кога не се знае колку пациенти има. Додека властите и Клиниките се правдаат со регистарот, кој инаку е едноставен за правење со оглед на тоа што македонското здравство веќе има големо искуство со формирање регистри (веќе се формирани регистри за пациенти со ретки болести и за дијабетес), жени и мажи со карцином се молат да пристигне терапијата на Клиниката за онкологија.

Освен тоа што нема терапија, на Онкологија нема ни персонал и тоа владата и Министерството за здравство го знаат барем од јули, кога паднаа првите ветувања од министерот Арбен Таравари за нови медицински сестри, физичари итн. Потребни се 50 кадри, согласност од Министерството за финансии пред Нова Година немаше за ниеден. Сите проблеми на пациентите се влечат од година во година, а за овие пациенти времето е скапоценост.

Политичката партија Левица остро реагираше на најновиот колапс на Клиниката за онкологија. Во нивната програма тие предлагаат да се направат државни веледрогерии и затворен систем за дистрибуција на лекови кое ќе ги надмине овие проблеми.

И со оваа Влада продолжува уништувањето на Клиниката за онкологија и условите за лекување на пациентите со канцер. Јавното здравство веќе одамна не е приоритет за властите – тоа е само алатка за политички пазарења и профитирање на криминални структури. Министерот Таравари, кој помпезно најавуваше реформи во јавното здравство со кои би се надминале овие проблеми – од почетокот на владеењето до денес нема преземено никакви суштински активности како министер. Левица апелира на будно следење од институциите на криминалните активности на Клиниката за онкологија. Воедно, му порачуваме на Таравари да се врати од неговите непродуктивни екскурзии и конечно да “засука ракави”, рекоа од Левица.