За да ве служат максимално и оптимално да ве ладат, клима – апаратите мора да се одржуваат и затоа мора да внимаваме на одредени правила во нивното работење. Избегнувајте ги следните седум грешки за да може климатизерот да ве излади како што треба.

1. Не ги менувате или не ги чистите филтрите на климатизерот

Филтрите на клима – апаратите треба да се менуваат или чистат еднаш годишно. Поради неисчистените филтри, воздухот ќе циркулира помалку, а климатизерот може дури и да се расипе. Покрај тоа, поради валканите филтри, можете да добиете и повисока сметка за електрична енергија, а овој пропуст ќе го скрати и животниот век на апаратот.

2. Не правите годишен сервис на климатизерот

Чистете ја климата еднаш годишно. Ова можете сами да го направите користејќи видео инструкции што ќе ги најдете на интернет, или уште подобро, повикајте професионалци. Неопходно е годишно одржување на клима – апаратот за да може системот за ладење да работи што е можно поефикасно.

3. Немате прилагодлив термостат

Ако имате клима – апарат со прилагодлив термостат, тој автоматски ќе се регулира на температура која е за 7 до максимум 10 степени пониска од надворешната температура. Така, вашите сметки за електрична енергија ќе бидат помали бидејќи ќе се троши помалку електрична енергија. Исто така, ако ја оставите климата вклучена кога не сте дома, секогаш оставете ја да работи неколку степени повисоко отколку кога сте дома.

4. Го поставувате термостатот на премногу ниска температура

Истражувањата покажале дека човечкото тело е способно да се прилагоди на високи или ниски температури доста брзо, во рок од една или две недели. Кога ќе се земе предвид и дека сметките за електрична енергија ќе ви бидат помали ако го држите климатизерот на повисока температура и дека со поретко користење на клима – апаратот ќе придонесете и за зачувување на животната средина, периодот на прилагодување секако се исплати.

Затоа, ќе биде оптимално ако клима – апаратот, кога надвор е повеќе од 30 степени Целзиусови, работи на 26 или повеќе степени.

5. Не користите вентилатор

Секој вид вентилатор ќе помогне да се направи воздухот што циркулира низ вашиот дом попријатен. Ако имате вентилатор, климатизерот ќе работи помалку и затоа ќе трае подолго. Обрнете внимание на тоа крилцата на вентилаторот во текот на летот да се вртат спротивно од стрелките на часовникот, бидејќи тоа ќе му овозможи на воздухот подобро да циркулира.

6. Крилата на вентилацијата или термостатот не се добро поставени

Ако светлината од ламбата удира во термостатот поголемиот дел од денот, може да го наруши читањето на термостатот и да предизвика клима – апаратот да не работи максимално добро, дури и ако ви е удобно во просторијата. Особено ако не сте таму во текот на денот, можеби нема да забележите дека климатизерот премногу се напрега за да го излади просторот поради неправилноста во работењето на термостатот.

Блокирањето на вентилациските крила со мебел или со завеси, исто така, ја ограничува циркулацијата на воздухот. Затоа, внимавајте вентилациските крила со ништо да не бидат блокирани.

7. Не ги спуштате ролетните и не ги навлекувате завесите на прозорците

Сончевата светлина е непријател на вашиот клима – апарат. Ако ги спуштите ролетните и/или ги навлечете завесите за да спречите сончевите зраци да влезат во просторијата, ќе ја заштитите и просторијата од сончевата топлина.