Се поизвесно е дека Ерик тен Хаг ќе биде менаџерот што ќе го предводи Манчестер јунајтед следната сезона, а Холанѓанецот веќе и испорачал список со имиња на фудбалери кои сака управата да му ги донесе во летниот преоден рок.

Еден од условите за да ја прифати работата во Јунајтед за Тен Хаг биле и гаранциите дека тој ќе ја составува листата на засилувања и директорите нема да носат играчи без негова согласност како што беше во минатото, а исто така бараше да добие време за да направи конкурентен тим со кој екипата би се вклучила во трката за трофеите во сите натпреварувања.

Холанѓанецот наводно дал согласност да му биде дозволено на Пол Погба да си замине од „Олд трафорд“, нема ништо против да си оди и Кристијано Роналдо како и Џеси Лингард, Хуан Мата, Немања Матиќ, Фил Џонс и Единсон Кавани.

Што се однесува до засилувањата, новиот менаџер се очекува да го врати Дони ван де Бек од позајмица и да го направи главен играч во средниот ред, како што беше во Ајакс кога стигнаа до полуфиналето во 2020 година.

На листата на желби на Тен Хаг се наоѓаат и Деклан Рајс од Вест Хем и Калвин Филипс од Лидс како и Рубен Невеш од Вулверхемптон. Ова трио се очекува „да ја држи“ средината на теренот, но за нив Јунајтед ќе мора да издвои најмалку од 200 милиони евра. Цената на Рајс изнесува 100 милиони евра, Вулверхемптон најави дека не размислува да го пушти Невеш за помалку од 70 милиони евра, а Лидс за Филипс бара најмалку 30 милиони евра.

На списокот на желби на Тен Хаг се наоѓа и Џон Мекхин од Астон Вила кој би бил купен само доколку не се реализира трансферот на некој од првите тројца фудбалери.

Нов предводник во нападот се очекува да биде Хари Кејн од Тотенхем за кого Јунајтед подготвува понуда од 120 милиони евра.

Доколку не успеат да се договорат со Тотенхем, челниците на Јунајтед ќе се фокусираат на Данжума кој сезонава игра фантастично во дресот на Виљареал.