Кивито е многу вкусно овошје со киселкаст вкус, кое е здраво да се јаде. Ова овошје со карактеристични плодови е богато со многу важни микроелементи и минерали, како и со витамините А, Б и Ц.

Интересно е тоа што малкумина знаат дека само едно киви на ден ја задоволува дневната потреба од витамин Ц. Тоа воедно помага во подобрување на имунитетот и отпорноста на организмот кон различни видови инфекции.

Холестеролот во организмот има важна улога за работа на органите, бидејќи е дел од многу важни процеси во организмот. Тој може да се подели на добар и лош, а високото ниво на вториот може да доведе до заболувања на кардиоваскуларниот систем. За да може да се контролира нивото на холестерол во крвта, лекарите препишуваат различни медикаменти, како и диети за негово намалување. Медикаментозната терапија може да се замени со народната медицина, во која многу плодови и зеленчуци помагаат во намалување на високиот холестерол.

Еден од популарните начини е редовно јадење киви. Актинидинот е уникатен ензим што го содржи ова овошје, а истовремено има способност да влијае врз намалување на штетниот холестерол. Покрај тоа кивито содржи целулоза, која го помага согорувањето на маснотиите и намалување на холестеролот во крвта. Но, при негова консумација треба да внимаваат луѓето што имаат гастрит поради зголеменото ниво на киселост кај кивито, како и луѓето што имаат други проблеми со гастроинтестиналниот тракт.

Дали кивито треба да се лупи?

Експертите од клиниката Кливленд веруваат дека јадењето киви со лушпа ја зголемува содржината на влакна за 50 проценти. Кожата на златното киви содржи околу три грама влакна, додека кожата на зеленото киви има приближно 3,5 грама.

Докторот Јозеф Салхаб неодамна откри дека јадењето на целото киви, кое ја вклучува и лушпата, го зголемува внесот на влакна за дури 50 проценти.

„Ако јадете киви со кора, всушност ќе добиете 50 отсто повеќе влакна и малку повеќе витамини и хранливи материи“, рече Салхаб.

Како лесно да го излупите

Но ако сепак не можете да јадете киви со лушпа, еве неколку совети како најлесно да го излупите.

Она што за многумина е проблем е токму лупењето на кивито. Тоа има специфична влакнеста и многу тенка кора. Колку е позрело, толку е потешко да се излупи, затоа што во најголем процент содржи вода. Кога ќе решите да јадете киви има повеќе варијанти за лупење, но кој е најлесниот, без да го оштетите овошјето?

Една од варијантите е со обичен нож или ноже за овошје да се излупи кората и да се јаде она што ќе остане од него, бидејќи вака се оштетува месестиот дел. Друга варијанта е исто добро позната, а се прави со лажица. Прво кивито се сече на пола и потоа со лажица внимателно се поминува покрај кората, да се одвои месестиот дел. И последната варијанта е малку чудна, но соодветна ако го користите кивито за овошна салата. И за овој начин прво треба да го исечете кивито на пола, а потоа маталка од миксер ставете ја внатре и завртете еднаш, така што ќе се одвои кората од месестиот дел. На овој начин воедно добивате и киви исечкано на парченца.