Кошаркарите на ТФТ први ја отвораат новата сезона од македонските екипи со историскиот настап во квалификациите за пласман во Лигата на шампионите на ФИБА. Освојувачот на Купот на Македонија вечерва од 21 часот во СЦ „Борис Трајковски“ игра против германскиот Кемниц во четвртфиналето од квалификацискиот турнир.

– Учеството на ТФТ во Лигата на шампиони на ФИБА претставува остварување на сонот за сите кои ја започнавме оваа приказна и истата ја живееме неколку години наназад. Дали сме созреани како тим и организација за вакво натпреварување? Најверојатно сè уште не сме, меѓутоа добивме шанса да бидеме дел од ова натпреварување и ќе пробаме во целост да ја искористиме и да се претставиме во наше најдобро издание во моментов – вели тренерот на ТФТ, Боро Смилковски.

На квалификацискиот турнир што ќе се игра од денеска до недела покрај домаќинот ТФТ и Кемниц, ќе настапат уште четири екипи, Лестер (Англија) и Волунтари (Романија) кои ќе играат меѓу себе во првото четвртфинале, како и Тофаш (Турција) и Фрибург Олимпик (Швајцарија) кои обезбедија директен пласман во полуфиналето.

Во квалификациите ќе се игра по систем на елиминации и победникот од дуелот меѓу ТФТ и Кемниц во полуфиналето ќе игра против Фрибург Олимпик. Во првото четвртфинале играат Лестер и Волунтари и победникот од тој дуел ќе се сретне со Тофаш во полуфиналето. Турнирот во Скопје еден од четирите на кои треба да бидат познати четирите последни учесници во групната фаза во Лигата на шампионите на ФИБА во новата сезона.

Смилковски фаворитската улога му ја препушта на германскиот тим каде дел од стручниот штаб е поранешниот тренер на МЗТ Скопје, Ѓорѓи Кочов, но најавува игра и борба за победа.

– Играме против една од најдобрите германски екипи во моментов, екипа која има огромен потенцијал и состав кој делува импресивно и кој во претсезоната демонстрираше голем квалитет демолирајќи ги своите противници. Немаме никаков резултатски императив, но имаме обврска пред самите себе да го дадеме максимумот и на најдобар можен начин да ја презентираме македонската кошарка – вели Смилковски кој е задоволен од сработеното на подготовките.

– Задоволни сме од сработеното на подготовките, одигравме 6 натпревари на кои имавме можност да добиеме првична слика за екипата, да ги видиме добрите страни и недостатоците. Свесни сме дека за некои работи е потребно малку повеќе време за работите на „кликнат“. Го задржавме костурот на домашни играчи, ангажиравме кошаркари кои мислиме дека ќе ни помогнат и кои карактерно одговораат на менталитетот на екипата.