Пејачката Кели Кларксон во петокот го откажа својот настап во Лас Вегас, а извори тврдат дека во последно време се соочува со „скриени битки“. Таа требаше да ја отвори својата резиденција во „Цезарс Палас“, но концертот беше откажан само 90 минути пред да се појави на сцена.

Кларксон наводно изјавила дека не може да ризикува „сериозно оштетување“ на својот глас.

„Таа дава сè од себе и пее секоја нота со полна сила. Неверојатно моќна вокалистка е, но тоа остава траги врз нејзините гласни жици. Беше на работ да ѝ биде потребна операција. Не може да си дозволи понатамошно оштетување – оди по тенок мраз“, изјавил извор за „Пејџ сикс“.

Кларксон беше целосно отсутна од јавноста, но сега се врати на малите екрани и изјави: „Имав лични проблеми“.

Во март годинава, Кларксон пропушти 10 епизоди од својата ток-шоу емисија, а нејзиното место го пополнија гостински водители. Следниот месец повторно се повлече од јавноста, при што секојпат како причина ги наведе личните околности. Друг извор близок до пејачката изјавил: „Приватниот живот на Кели е неверојатно комплициран… Се соочува со сериозни, длабоко лични битки за кои малкумина знаат. Тоа е извор и на емоционални и на физички тешкотии“.

Инаку, Кларксон пред неколку години се разведе од Брендон Блексток, со кого има две деца. Претходно отворено зборуваше колку разводот по седум години брак влијаел на неа, како и правната битка што следела.

„Да бидам брутално искрена – не го поднесов добро разводот“, изјави таа тогаш.

Кели треба повторно да настапи во Лас Вегас овој петок, а пред настапот се огласи на социјалните мрежи со емотивна порака. Изјави дека сака да создаде „најинтимно и најневообичаено искуство“ за своите фанови.

„Подготовките и пробите си го направија своето… мојот глас страда. Неизмерно сум благодарна за вашата поддршка и скршена сум што морам да одложам“, напиша таа, додавајќи дека со нетрпение го очекува следниот настап.

Познатата пејачка ослабе 60 килограми и ги демантираше гласините: „Каков Оземпик, молам?“

Поради лични проблеми, како што претходно откри „Пејџ сикс“, можно е Кларксон наредната година да се откаже од својата емисија „Кели Кларксон шоу“. Во мај изјави дека ток-шоуто ѝ попречило да тргне на турнеја.

„Подолго време не сум настапувала, затоа што имам емисија. Тоа е како сосема поинаква работа“, рече таа.

Нејзиниот договор со Ен-би-си истекува по седмата сезона во 2026 година, а можно е да не биде обновен.