„Конмебол“, јужноамериканската фудбалска конфедерација донесе казни за пет уругвајски репрезентативци кои учествуваа во нереди со навивачите на Колумбија по поразот од 0:1 во полуфиналето на Копа Америка годинава во Шарлот, САД.

Најтешко помина напаѓачот Дарвин Нуњез, кој доби суспензија за следните пет официјални натпревари. Покрај Нуњез, тешки казни добија и другите членови на тимот. Родриго Бентанкур ќе пропушти четири натпревари, додека Роналд Араухо, Хозе Марија Хименез и Матиас Оливера ќе пропуштат по три натпревари. Сите играчи се суспендирани и парично казнети: Нуњез со 20.000 долари, Бентанкур со 16.000 долари, додека Араухо, Хименез и Оливера се казнети со по 12.000 долари. Казнета е и Фудбалската асоцијација на Уругвај со 20.000 долари.

Капитенот на Уругвај, Хозе Марија Хименез ги бранеше постапките на своите соиграчи, тврдејќи дека играчите ја прескокнале оградата за да ги заштитат своите семејства за време на хаотичните сцени по натпреварот.

Овие играчи ќе го пропуштат останатиот дел од квалификациите за СП 2026 година. Уругвајците во септември ќе се соочат со Парагвај во Монтевидео и со Венецуела во Матурин, додека во октомври имаат гостување со Перу и домашен меч со Еквадор. Во ноември, Уругвај ќе ја пречека Колумбија, а потоа ќе биде домаќин на Бразил.

По шест квалификациски кола, Уругвај е на второто место со 13 бода, два помалку од водечката Аргентина, но осум повеќе од седмопласираниот Парагвај, кој во моментов се бори за место во дополнителните квалификации. Казните наметнати на клучните играчи би можеле значително да влијаат на понатамошниот тек на квалификациите за Уругвај.