Претседателката на Европската комисија Урсула фон дер Лајен ги пофали реформските напори на Северна Македонија, но ја истакна потребата од напредок во уставните промени доколку земјата сака да постигне напредок со нејзината кандидатура за пристапување во ЕУ, пишува грчки Катимерини коментирајќи дека новата конзервативна влада на Христијан Мицкоски ќе го смени Уставот само ако Бугарија го одобри членството во ЕУ.

„Спорот на Северна Македонија со соседот и членка на ЕУ, Бугарија го одложи нејзиниот процес за пристапување во ЕУ. Претходната левичарска влада се согласи да додаде референца за бугарско етничко малцинство во уставот за да го надмине ќор-сокакот, но немаше парламентарно мнозинство за да ја донесе промената. Новата конзервативна влада на премиерот Христијан Мицкоски останува на ставот дека ќе го измени Уставот само доколку Бугарија прво го одобри членството на Северна Македонија во ЕУ без дополнителни услови“, пишува медиумот.

„Речиси сме таму, но знаеме дека се работи за уставни промени на кои се обврза вашата земја“, рече фон дер Лајен на заедничката конференција со Мицкоски во Скопје, додека беше на турнеја од шест земји низ регионот.

Руската инвазија на Украина и стравувањата од поширока нестабилност во Европа ја додадоа итноста на кандидатурите за пристап во ЕУ на балканските земји кои бараат влез.

ЕУ ги започна преговорите за членство со Северна Македонија и Албанија во 2022 година, а блокот неодамна го продолжи самостојно процесот на пристапување на Албанија, отстапувајќи од претходниот пристап за придвижување на двете земји заедно.

Фон дер Лајен побара меѓупартиска поддршка во Северна Македонија за уставниот амандман. Нејзината регионална турнеја продолжува со посети на Босна Херцеговина, Косово, Србија и Црна Гора, додека ЕУ се обидува да ги увери земјите од Западен Балкан во нивните изгледи за членство.