Пејачката Каролина Гочева се прости од своите пријатели и колеги од групата „ДНК“, кои трагично ги загубија животите во пожарот во дискотеката „Пулс“ во Кочани – музичарите Андреј Ѓорѓиески, Сара Пројковска, Ѓорѓи Ѓорѓиев, Филип Стевановски и Александар Коларов, како и официјалниот фотограф на групата, Александар Ефремов и тонецот Игор Велков.

Со скршено срце, музичката ѕвезда сподели емотивна порака на својот инстаграм-профил.

„Со скршено срце се збогуваме со нашите пријатели, колеги, Андреј, Сара, Ѓорѓи, Александар Коларов, Александар Ефремов, Филип, Игор… Ќе продолжат да живеат во секоја песна и секое срце кое го имаат допрено преку нивната работа. Занемени сме од болка!“, напиша таа.

Гочева изрази најдлабоко сочувство до семејствата и најблиските на загинатите.

 

View this post on Instagram

 

A post shared by Karolina Goceva (@karolinagocheva)

Да потсетиме, бројот на жртвите во разорниот пожар што го зафати ноќниот клуб „Пулс“ во Кочани продолжува да расте. Според најновите информации, досега загинаа најмалку 59 лица, додека бројот на повредени кои се хоспитализирани низ болниците низ Македонија достигна 155.

Огнената стихија избувна во преполниот клуб во утринските часови, а според сведоците, пожарот брзо се проширил, оставајќи малку време за бегство.