Карлос Алкараз добил 900.000 долари само за учество во Буенос Аирес
Организаторот морал да го одврзе кесето за да го донесе Шпанецот на Аргентина опен, турнир на кој вкупниот награден фонд изнесува 730.000 долари, а шампионот добива 98.000 долари
Според аргентинскиот медиум „Ла насион“, тенисерот број два на светот Карлос Алкараз добил 900.000 американски долари само да учествува на турнирот во Буенос Аирес, Аргентина, на кој шокантно изгуби во полуфиналето од Николас Жари со 6-7, 3-6.
Целиот награден фонд на овој турнир наречен „Аргентина опен“ е околу 730.000 долари, шампионот добива околу 98.000 долари, а финалистот 57.000 долари.
Турнирот е во рангот АТП 250 што е релативно низок ранг и затоа организаторите на ваквите турнири мораат да ги плаќаат екстра големите имиња, за тие да учествуваат.
Алкараз ја бранеше титулата на овој турнир, а изгуби во полуфиналето од Чилеанецот Николас Жари, кој е 19. на АТП листата.
Жари подоцна во финалето изгуби од Аргентинецот Факундо Дијаз Акоста во два сета.
Според организаторот на Аргентина опен, вкупната сума за да се организира турнирот е три до четири милони долари годишно.
Интересно, еден од косопствениците на овој турнир кој е во сопственост на приватна компанија, е Чилеанец, а другиот Белгиец.
