Во Мадрид започна судењето на тренерот на шпанскиот фудбалски клуб Реал Мадрид, Карло Анчелоти. Познатиот италијански стратег е обвинет за даночна измама.

Шпанското обвинителство го обвини Анчелоти дека затаил данок во износ од повеќе од еден милион евра, откако не пријавил заработка од правата на сопствениот имиџ во периодот од 2014 до 2015 година, за време на неговиот прв мандат како тренер на Реал Мадрид.

Според обвинителите италијанскиот тренер во даночните пријави само го пријавил личниот надомест што го добивал од Реал во тие две години, иако самиот се изјаснил како даночен резидент во Шпанија и изјавил дека неговиот дом е во Мадрид.

Обвинителите во Мадрид бараат казна затвор од четири години и девет месеци за Анчелоти.