По двата триумфи на почетокот на плеј-офот од македонската ракометна Суперлига, во третото коло Вардар во петок (24 февруари) од 18.30 часот повторно дочекува градски ривал, екипата на Бутел. Сезонава во меѓусебните дуели „црвено-црните“ двапати победија, во СЦ „Јане Сандански“ со 30:21, а на гости со 26:23.

По двете одиграни кола Вардар е лидер на табелата со девет бодови, а Бутел е последен со еден бод. Вардар гостуваше во Охрид во претходното коло и во дерби дуел победија со 27:23, а Бутел загуби дома од Еурофарм Пелистер 2 со пресврт во последните минути, иако скопјани имаа и предност од „плус шест“.

– Ги гледавме нивните натпревари, и особено овој последниот со Еурофарм Пелистер 2 што Бутел го загуби. Играа одлично во првиот дел. Според мене големо засилување за Бутел е враќањето на Томче Стојановски особено во одбраната. Игравме со Бутел и во регуларниот дел од сезоната, знам како беше тогаш иако двапати победивме. За нас е особено важно играњето во домашното првенство, и затоа на секој меч влегуваме со мотив и желба за триумф. Имаме неколку нови ракометари во пролетниот дел, но со секој меч се повеќе тие влегуваат во системот. Веќе 3-4 натпревари сме заедно, и играме сè подобро. Овој меч ќе биде генерална проба пред СЕХА – Газпром лигата со Партизан, но секако прво треба да одиграме добро со Бутел, па потоа да мислиме на следниот меч – вели Мартин Карапалевски, средниот бек на Вардар.

Повредите на претходните мечеви секогаш го кроеја систавот на Вардар, па така ќе биде и сега. Во тимот има ситни повреди кај неколку ракометари, и во зависност од нивната здравствена состојба ќе се реши кој ќе настапи во петок.

– Секој меч е посебен, и меч за себе. Кога играат против Вардар сите се мотивирани. Затоа ние сме постојано подготвени за секој предизвик. Играме ден порано за да можеме да имаме потоа ден одмор, и плус уште два дена плус за подготовки за следниот меч од СЕХА лигата против Партизан. Бутел е сериозне тим, каде има и млади и искусни ракометари. Знаат добро да играат и тоа го покажаа и во првиот дел од сезоната. Ние направивме анализа и секако сме подготвени – вели Владо Недановски, тренерот на Вардар.

Скопските „црвено-црни“ дуелот со белградски Партизан во СЕХА Газпром лигата ќе го имаат на 28 февруари. Таму во групата „Б“ на табелата води Вардар 1961 со шест бодови, три Татран Прешов, а ниту еден Партизан.