Концертот за сопран и оркестар на „Скопски солисти“ ќе се одржи на 10 април, со почеток во 20 часот, во камерната сала на Филхармонија. Како солист ќе настапи сопранот Ивана Здравкова (Австрија), а ќе диригира маестра Бисера Чадловска.

На програмата се дела од композиторите Т. Албинони, Г. Перголези, М. Николовски и Е. Елгар. Раководител на камерниот оркестар „Скопски солисти“ е м-р Васил Атанасов.

Камерниот оркестар „Скопски солисти“ на македонската музичка сцена се појави во 2000-та година. Оваа благородна и убава идеја, по примерот на загребските, софиските и други слични оркестри на Балканот, ја реализираше обоистот проф. м-р Васил Атанасов. Оркестарот е формиран од група афирмирани и признати македонски уметници, на кои им се придружија група млади, но мошне талентирани музичари.

Интенцијата на овој ансамбл е да презентира камерна музика, од барок па сѐ до современа музичка литература, со истакнато чувство и респект кон македонското музичко творештво.

Сопранистката Ивана Здравкова, за која австриската критика вели „луксуз“ и „со многу сигурен, впечатлив и мек сопран“ е родена во Скопје, Македонија, во музичко семејство (музичари – оперски пејачи). Воведот во уметноста, на македонско-австралиската пејачка е преку балетниот танц во Мелбурн.

Нејзината вокална обука започна во средното музичко училиште „Илија Николовски Луј“ кај професорките S. Дамовска и А. Коцевска, а продолжи на Факултетот за музичка уметност при Универзитетот „Св. Кирил и Методиј“ во Скопје, кај М. Муратовска и Весна Ѓ. Илкова, каде дипломира со „Кум Лауде“.

Здравкова потоа магистрира на Универзитетот за музика и изведувачки уметности во Грац, кај унив. проф. маг. Јоана Боровска-Исер. Таа повеќе години настапува во продукции на театарот „Баден“ во Австрија.