Висока делегација на севернокорејски воен персонал во понеделникот (30.06) замина за Москва, а аналитичари сугерираат дека Пјонгјанг се подготвува да испрати дополнителни војници во наредните недели за да ѝ помогнат на Русија во војната против Украина.

Шефот на Советот за безбедност на Русија и поранешен министер за одбрана, Сергеј Шојгу по посетата на Северна Кореја минатиот месец, за руските медиуми изјави дека севернокорејскиот лидер Ким Јонг Ун се согласил да испрати уште 6 илјади воени инженери и работници во регионот Курск на границата со Украина, потенцирајќи ги засилените воени релации меѓу Москва и Пјонгјанг.

Националната разузнавачка служба (НИС) на Јужна Кореја ги потврди бројките. Шпионската служба наведува и дека Северна Кореја ја снабдила Русија со повеќе од 10 милиони артилериски гранати и проектили, а за возврат добила помош во вид на економска соработка и воена технологија.

Заемно корисен договор

Аналитичарите велат дека со оглед на придобивките за двете страни, мошне веројатно е дека Северна Кореја ќе испрати дополнителни војници да се борат заедно со руските колеги на подолг рок.

„И Москва и Пјонгјанг од овој договор го добиваат тоа што им е потребно“, оценува Јаков Зинберг, професор по меѓународни односи на Универзитетот Кокушикан во Токио.

„Знаеме дека Русија имаше стотици илјади убиени и ранети и дека владата не сака да ја прошири мобилизацијата во големите градови како Москва и Санкт Петербург, бидејќи тоа би можело да го загрози режимот на [рускиот претседател Владимир] Путин во тие градови“, вели тој за ДВ.

Севернокорејските власти пак се обидуваат распоредувањето на војниците да го користат како можност за „будење“ на нацијата. Во сцени кои се чинеа инсценирани за да се поттикне национален занес пред испраќањето на војниците, државните медиуми на почетокот на неделава емитуваа снимки од Ким како поставува севернокорејско знаме над ковчег на церемонија по повод враќањето на посмртните останки од војници убиени во борбите. Иако на видеото се прикажани само шест ковчези, извештаите од западните разузнавачи сугерираат дека од околу 11 илјади севернокорејски војници испратени досега, околу 6 илјади се убиени, ранети или заробени. Снимката го прикажува Ким како плаче за време на заедничката културна манифестација со Русија во Пјонгјанг во саботата, организирана по повод годишнината од потпишувањето на билатералниот воен договор со рускиот лидер Владимир Путин.

Севернокорејски војници „му помагаат на режимот на Путин“

Иако Пјонгјанг распоредувањето војници го користи како пропагандна алатка, присуството на севернокорејски војници е благодет и за руските власти и за граѓаните. „Поголемиот дел од досега регрутираните потекнуваат од зафрлените републики и немаше многу отпор, но кога разговарам со Русите, секогаш велат дека се плашат од уште една мобилизација“, вели Зинберг, кој е по потекло од Санкт Петербург.

„Кога владата објавува дека уште 6 илјади севернокорејски војници ќе бидат испратени на фронтот, им порачуваат дека може да се опуштат затоа што се безбедни“, вели тој и додава: „Значи, испраќањето Севернокорејци всушност му помага на режимот на Путин“.

Зинберг анализира и дека испраќањето на севернокорејски војници е калкулирано за „ширење страв“ меѓу европските сојузници на Украина, кои претходно се надеваа дека Русија порано или подоцна ќе остане без луѓе и материјал, додека присуството на нуклеарен сојузник во Источна Азија ќе ги држи САД, Јужна Кореја и Јапонија на штрек.

Ра Јонг-Јил, поранешен дипломат и висок јужнокорејски разузнавач, се согласува дека „фундаменталната причина“ зошто Северна Кореја се согласила да испрати дополнителен контингент на војници е поради загубите што Русија веќе ги претрпе на фронтот.

„Се чини дека некои од војниците ќе бидат користени и како работници за обнова на инфраструктурата во окупираните области, а севернокорејските војници се добри за таква работа бидејќи често се користат за таква намена на Северот“, заклучува тој.

Ра очекува дека Северна Кореја „ќе продолжи да испраќа персонал дури и по завршувањето на борбите, бидејќи на Русија сè уште ќе ѝ недостасуваат работници за обнова на областите погодени од борбите“.

Може ли помошта на Русија да обезбеди опстанок на режимот во Пјонгјанг?

Разузнавачите сметаат дека Русија на Северна Кореја ѝ возвратила со гориво, храна и пристап до напредна воена опрема што претходно Пјонгјанг тешко можеше да ја обезбеди, бидејќи режимот е под строго ембарго и санкции од ОН поради нуклеарната програма.

Друга придобивка за Пјонгјанг е едноставно престижот да се биде клучен сојузник на глобална сила, алијанса која Северна Кореја може многу добро да ја искористи во трговските и безбедносни релации со Кина, која долго време е најблизок партнер и заштитник на режимот.

„Им се допаѓа статусот што го стекнуваат како пријател на Русија“, оценува Зинберг и очекува „и натаму да останат блиски со Москва, дури и по завршувањето на војната, нудејќи ѝ војници и работници, бидејќи знаат дека тоа може да им донесе бенефити што ќе го крепат режимот и ќе помогнат да опстане.“

Извор: Дојче веле/ Автор: Џулијан Ријал