Пеколните горештини без клима-апарат многу тешко се поднесуваат, но многумина не се свесни дека го вдишуваат воздухот од апаратите кој е често легло на бактерии, мувла и габички.

Многу домаќинства и компании имаат клима-апарати, кои најмногу се користат во топлите летни месеци. Меѓутоа, повеќето луѓе често забораваат дека нередовното чистење на клима-апаратите предизвикува не само лош квалитет на воздухот и непријатни мириси во домот, туку придонесува за размножување на бактериите, мувлата и габичките.

Производителите препорачуваат клима-апаратот темелно да се исчисти еднаш годишно, најдобро кон крајот на пролетта. И лекарите советуваат дека одржувањето и чистењето е неопходно, пред сѐ, од хигиенски, односно здравствени причини. Со чистењето се спречува појавата и размножувањето на бактериите и другите микроорганизми.

Како да го исчистите клима – апаратот?

Во продавниците можете да се снабдете со специјални средства, главно, во вид на спреј, со кои клима-апаратот се чисти од бактерии и габички, а воедно и дезинфицира. Тие средства би требало да ги користите внимателно и стриктно според упатството, бидејќи само така ќе бидат ефикасни. Надворешните и лесно приступачните внатрешни пластични делови внимателно измијте ги со млака вода, во која сте раствориле некое средство за чистење. Може да користите и детергнет за садови.

Доколку се одлучите сами да ги откачите и исчистите филтерите што се наоѓаат во клима-апаратот, бидете претпазливи бидејќи пластичните „жабички“ можат лесно да пукнат. Пред ова, неопходно е да го проучите упатството или оваа работа да ја препуштите на постручно лице.

Проверката на состојбата на гасот, компресорот или вентилаторот на клима-апаратот може да ја направи само мајстор, а оваа услуга чини и неколку илјади денари. Вие можете да ја измиете надворешната кутија и да го проверите одводното црево, кое понекогаш се затнува или свиткува, па кондензираната вода не може да истекува.

Колку често треба да го чистите климатизерот?

Не треба да чекате од клима-апаратот да почне да се шират непријатни мириси или апаратот да почне послабо да лади или грее. Бидејќи, само правилно и навреме исчистениот клима-апарат може да создаде здраво опкружување за вас и вашето семејство. Не заборавајте и на клима-апаратите во автомобилите, кои треба да се сервисираат на две години. Луѓето склони на алергии мора тоа да го прават почесто, како и да го чистат клима-апаратот во домот или на работа.

Правилна употреба на клима – апаратот

Не заборавајте дека и човекот може да доживее температурни шокови, ако не ракува со клима-апаратот на вистинскиот, правилен начин. Затоа, наместете го апаратот на пет до осум степени помалку од надворешната температура. Избегнувајте да бидете на директен удар на студениот воздух, за да ги избегнете проблемите во вратот и грбот.

Исто така, внимание би требало да обрнете и на тоа каде го поставувате клима-апаратот дома. Не би требало да биде свртен директно да дува кон местото на кое најчесто се собираат луѓето (гарнитури за седење, трпезариска маса), бидејќи може да предизвика главоболка, воспаление на мускулите, течење на носот и солзење на очите.

Опасности од клима – апаратот

Кога го вдишуваме воздухот од неисчистен клима-апарат, може да дојде до опасни реакции во организмот, хронични заболувања, дури и до појава на легионерска болест, која настанува од бактеријата легионела. Во прашање е тешко воспаление на белите дробови, неретко со фатални последици. До инфекција доаѓа кога ќе се вдишат заразените ситни капки од клима-апаратот. Симптомите се кашлица, треска и потење, болка во градите, болка во зглобовите и мускулите, телесна температура над 40 степени, главоболка и малаксаност проследена со дијареја (пролив)…

Во првите неколку дена изостануваат респираторните симптоми. На ова заболување повеќе склони се постарите лица, особено оние со хронични болести на бубрезите, срцето и белите дробови, како и лицата со послаб имунитет, пушачите и алкохоличарите. Три пати почесто заболуваат мажите. Единствена терапија се силните антибиотици, а превенција е редовно чистење на клима-апаратите и миење на филтерот.