Во текот на летото, кога температурите достигнуваат високи вредности и воздухот е заситен со влага, телото поминува низ низа адаптации за да се разлади. Овие промени можат значително да влијаат на луѓето кои страдаат од висок крвен притисок и срцеви заболувања.

Високите температури и притисок се поврзани со зголемено оптоварување на срцето. Кога е жешко и спарно надвор, телото го зголемува протокот на крв во кожата за да ја разлади. Затоа срцето мора да работи побрзо и посилно – дури и двојно повеќе отколку во нормални временски услови.

Ризикот дополнително се зголемува кога температурата е над 21 °C, а влажноста е поголема од 70%.

Лицата постари од 50 години, со прекумерна тежина или со срцеви, белодробни или бубрежни заболувања се особено чувствителни на овие временски услови.

Високите температури и притисокот – што треба да знаеме?

Високите температури и притисокот не се безопасна комбинација – особено за оние со постоечки здравствени проблеми. Еве на што треба да се подготвите кога ќе дојдат жештините.

Дехидратација и срцето – тивок летен проблем

Потењето и губењето течности можат брзо да доведат до дехидрација, особено ако не пиеме доволно вода. Кога телото губи повеќе течности отколку што прима, волуменот на крв се намалува, што создава дополнителен товар на срцето и му отежнува на телото природно да се олади.

Дехидрацијата може да има сериозни последици, особено кај постарите лица, хронично болните или оние кои поминуваат време на отворено поради работа или вежбање.

Со зголемен ризик се:

– лицата со срцеви, белодробни и бубрежни заболувања

– лицата кои земаат диуретици, седативи или лекови за крвен притисок

– лицата кои се на диета со малку сол

– лицата со проблеми со циркулацијата.

Доколку имате историја на висок крвен притисок, се препорачуваат почести мерења за време на топлотните бранови, избегнување на изложување на сонце напладне, носење капа и заштита од сонце и редовно внесување течности.

Предупредувачки симптоми

На знаците дека телото не е во можност да ја регулира температурата треба брзо да се реагира. Обрнете внимание на:

-ладна, испотена кожа

-конфузија или дезориентација

-вртоглавица и забрзан пулс

-замор

-главоболка

-гадење

-мускулни грчеви

-оток на екстремитетите.

Појавата на повеќе од еден од овие симптоми е причина за итна медицинска помош.

Лековите и жештините

Покрај ладењето на телото, важно е и правилно да се чуваат лековите. Високите температури и притисокот можат да влијаат на ефикасноста на лековите, особено лековите за дијабетес како што е инсулинот.

Чувајте ги лековите во нивното оригинално пакување, на ладно и суво место, подалеку од влага и директна сончева светлина. Лекови како што се бета-блокатори, диуретици, антихистаминици и антипсихотици можат да ја намалат способноста на телото да се справи со топлината и да ја задржи хидратацијата.

Доколку имате какви било сомнежи за тоа како топлината влијае на вашата терапија, разговарајте со вашиот лекар или фармацевт.