Пиењето три шолји мелено кафе дневно, наместо инстант кафе, го намалува ризикот од смрт, покажа нова студија. Речиси половина милион Британци биле вклучени во студијата на Биобанк Велика Британија (UK Biobank). Тие биле поделени според нивниот внес на кафе: оние кои не пиеле, оние кои пиеле до три шолји дневно и оние кои пиеле повеќе од три шолји дневно.

Студијата покажа дека оние кои пиеле кафе умерено, до три шолји дневно, имале 12 отсто помала веројатност да умрат во текот на 11-годишниот период на студијата. Тие исто така имале 17 проценти и 21 процент помала веројатност да умрат од срцеви заболувања или мозочен удар, соодветно, според студијата на Универзитетот Семелвајс во Будимпешта и Универзитетот Квин Мери во Лондон.

Околу 3,4 отсто од оние кои пиеле умерени количини кафе починале во текот на повеќегодишната студија, во споредба со 3,7 отсто од оние кои не пиеле кафе и 4 отсто од оние кои пиеле повеќе кофеин.

Меѓу оние кои пијат кафе, една петтина претпочитала кафе без кофеин, една четвртина пиела мелено кафе, а повеќе од половина пиеле инстант кафе.

„Користејќи магнетна резонанца, бевме во можност да го анализираме ефектот од редовната консумација на кафе врз структурата и функцијата на срцето. Откривме дека редовната консумација на мали до умерени количини кафе е корисна за здравјето на срцето, со сугестија дека може да ги забави срцевите промени поврзани со возраста“, рече еден од коавторите на студијата, д-р Пал Маурович-Хорват.

Здравствените придобивки од кафето се однесуваа само на меленото кафе и не беа забележани кај оние што пијат инстант кафе.

„Не откривме статистички значајна поврзаност помеѓу редовната консумација на инстант кафе и здравствените резултати“, напишаа научниците во студијата.

Разликата помеѓу различните видови кафе може да се објасни со разликите во нивните производствени процеси, бидејќи содржат различни хемикалии. Истражувачите заклучија дека придобивките од кафето се само делумно поради кофеинот, при што антиоксидансите и другите хемикалии веројатно играат клучна улога.

„Повеќето учесници пиеја мелено или инстант кафе. Меленото кафе во умерени количини беше поврзано со помал ризик од смртност, но оваа корист не беше забележана кај редовните пијачи на инстант кафе. Ова може да се должи на различните процеси на производство на мелено и инстант кафе, бидејќи тие содржат различни адитиви“, рекол д-р Захра Раиси-Естабраг од Универзитетот Квин Мери.

Разликата во здравствените придобивки од меленото и инстант кафето треба да биде во фокусот на идните истражувања, велат истражувачите.

„Кафето е еден од најшироко консумираните пијалоци во светот. Сепак, неговите кардиоваскуларни ефекти не се добро разбрани, а некои претходни студии покажаа контрадикторни резултати. Според нашите сознанија, ова е најголемата студија досега што се фокусирала на ефектите на кафето врз здравјето на срцето и крвните садови“, заклучил експертот за кардиоваскуларна медицина, професор Стефен Петерсен.