Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Џијан Емин

Матичен диригент на ЗЏМ Биг бенд, хорнист, оркестратор, композитор, продуцент… еден од најистакнатите современи музичари кај нас и во регионот, Џијан Емин е страстен вљубеник во музиката и во својата професија. Тој вели дека музиката го одмора и го релаксира, така што нему речиси секој ден му е одмор. Сепак, ужива во летото и сака сонце и вода.

Како ќе го поминеш летото?

– Ова лето веќе го уживам со чести патувања преку моите ангажмани и семејните патувања, т.н. одмори. Летото е убав период од годината кога најголемиот дел од населението се опушта и со тоа генералната тензија и хаосот се смируваат. Секако, сонцето во комбинација со водата значително придонесува за општото добро расположение. Секогаш уживам во летото.

На прашањето дали ова лето има професионални ангажмани, тој вели дека нема разлика во однос на другите годишни времиња. Џијан работи и се подготвува за нови проекти дури и кога е слободен.

– Јас имам професионални ангажмани низ текот на целата година, исто така и во летниот период кога се случуваат многу фестивали. Дури и кога немам настапи, работам на неколку проекти паралелно кои бараат многу време за подготовка. Ова лето во Македонија ќе имаме неколку настапи со ЗЏМ Биг бендот.

Како го замислуваш твојот одмор од соништата?

– За уметникот терминот одмор има поинакво значење. Јас лично најмногу се одморам или се рехабилитирам низ музиката, која е патем и моја професија. Така гледано јас се одморам или уживам низ текот на целиот мој живот.

Омилено место во Македонија за бегање од секојдневието?

– Убаво е човек да може да отиде на море, езеро, планина и да си помине убаво во добро друштво. Кога ќе се каже „бегање од секојдневието“, мене ме асоцира на бегање сам од себе. Тоа е невозможно. Напротив, предлагам поскоро соочување на секој сам со себе за да нема потреба да бега никој од никого.

Матеа Јанковска

Нашата млада и веќе наградувана актерка од Театарот за деца и младинци Матеа Јанковска, која освојува со својата харизма и на сцената и надвор од неа, повеќе сака планини и убави природни пејзажи. Наместо море и плажа, совршениот летен одмор го замислува на планина покрај своето куче и луѓето што ги сака.

За професионалните ангажмани ова лето таа вели:

– Успешно ја затворивме сезоната во мојот матичен театар ТДМ. Дадовме премиера на најновата претстава „Франкештајн“ и бевме на уште еден фестивал со претставата „Роња, ќерката на ограбувачот“ во Котор, каде што освоивме уште една награда за најдобра претстава. Во моментов работам на нов независен проект во Прага. Неодамна започнавме со проби за претставата. Така што ова лето ќе ми биде работно.

Како го замислуваш твојот одмор од соништата?

– Планина, шатор, мир, кучето и луѓето што ги сакам.

Омилено место во Македонија за бегање од секојдневието?

– Шопско Рударе, на гости кај другарот Златкац и Скопска Црна Гора кај другарот Давид (кози, млеко, планина).

Лука Ѓоргиевски

Фронтменот на една од највпечатливите македонски групи „Фанк шуи“, Лука Ѓоргиевски, впечатливо различен од другите, очекувано ни даде и такви одговори. Концертно активни со бендот кај нас и во регионот, ова лето Лука нема многу време за одмор надвор од професионалните ангажмани.

Како ќе го поминеш летото?

– Со оглед на ангажманите, евакуирано, под сенката на кревко оформената интровертност на „Фанк шуи“. И потполно отворено за енергиите од Израел, Крит, Северна Каролина и Јапонија.

Како го замислуваш твојот одмор од соништата?

– Соновите ми се прелеваат во јаве и јавето често го сонам. Ќе ви кажам во октомври.

Омилено место во Македонија за бегање од секојдневието?

– Знаете…