Поделбите меѓу украинскиот претседател Володимир Зеленски и неговата воена команда стануваат сè поочигледни. Игор Зовка, заменик-началникот на Генералштабот на Зеленски, во саботата ја осуди оценката на украинскиот воен командант дека војната со Русија е во „застој“. Зовка реагираше на интервјуто со воениот командант Валериј Залужни, кој за британски Економист изјави дека Украина е во ќор-сокак и дека најверојатно нема да има длабок пробив во војната.

Зовка за украинската телевизија изјави дека Русите „внимателно ќе читаат, ќе земат белешки и ќе извлечат заклучоци“ од интервјуто на Залужни. Тој рече дека добил повици од колеги во партнерските земји „кои се во паника“ и се прашуваат дали војната навистина е во ќор-сокак, како што ја опиша Залужни.

„Дали ова е ефектот што сакавме да го постигнеме со овој напис?“ праша Зовка. „Можеби ова е многу длабок стратешки план и на тој начин ќе постигнеме одреден успех. Но, да бидам искрен, многу сум изненаден“, додаде тој.

Тензиите доаѓаат во клучен момент во војната. Контраофанзивата на Киев е бавна, а војната на Блискиот Исток ги поттикна стравувањата дека финансиската и воената помош од Запад може да попушти.

Зеленски не се согласува со оценката на Залужни на прес-конференцијата со претседателката на Европската комисија Урсула фон дер Лајен, но призна дека луѓето се уморни по 18 месеци војна во земјата. „Луѓето се уморни. Сите се уморни. Има различни мислења. Но, ова не е ќор-сокак. Ова уште еднаш го потенцирам. За ова веќе разговаравме. Ова не е новост“, рече Зеленски.

„Сите ние треба да се собереме и да ги решиме проблемите, да работиме повеќе со нашите партнери за противвоздушна одбрана, да го деблокираме небото и да им дозволиме на нашите момци да преземат акција. Тоа е она за што треба да размислуваме. Само за тоа. Не за тоа каде ќе биде утре“, вели Зеленски.

Во своето интервју, Залужни, исто така, ја истакна визијата за тоа што Украина треба да направи и каква поддршка е потребна од партнерите за да се извлече од мртвата точка.

„Никој не верува во нашата победа како јас. Никој“, изјави Зеленски за „Тајм“. „Војната исцрпеност станува сè појасна. Тоа го гледате во САД, во Европа“, рече Зеленски.

Тој призна дека избувнувањето на војната меѓу Израел и Хамас го оттргна вниманието од борбата на Украина против Русија. „Секако дека губиме поради настаните на Блискиот Исток. Луѓето умираат и таму е потребна помош од светот за да се спасат животи“, рече Зеленски.

Украинскиот лидер претходно изрази солидарност со Израел, препорачувајќи им на светските лидери да одат во Израел и да пружат поддршка на „луѓето кои беа под терористички напад“.

Во меѓувреме, Украина продолжува со тешка контраофанзива против руските сили на југ и на исток.

Киев успеа да изврши неколку успешни воздушни напади и објави дека неговите воздушни сили извршиле успешни напади врз бродоградилиштето во источниот пристанишен град Керч, окупиран од Русија, на полуостровот Крим во саботата.

Украинците тврдат дека уништиле нов руски борбен брод кај Крим

Командантот на украинските воздухопловни сили, Микола Олешук, во објава на Телеграм им честиташе на пилотите кои учествуваа во нападите. Официјален претставник назначен од Русија рече дека мета било бродоградилиште, но противвоздушната одбрана ги соборила проектилите.

Кримскиот мост, познат и како мост Керч, во саботата беше привремено затворен за сообраќај два часа. Руските власти не ја наведоа причината за затворањето на виталниот пат што ја поврзува континентална Русија со окупираниот полуостров.