Денеска во првото коло од групата Ц на Европското првенство Дивизија А во Белград, Србија, македонската машка јуниорска кошаркарска репрезентација загуби доста убедливо со 137:62 против Литванија.

Ривалите веќе во првата четвртина доминираа и по првите 10 минути стекнаа двоцифрена предност (33:15).

Во исто темпо се движеа настаните и во втората четвртина, во која тимот од Балтикот изгради уште поголема предност (59:30), недостижна за нашите јуниори. На средина од третата четвртина, Литванија имаше ушпте поголем плус (82:39).

До крајот прашање беше само со колкава разлика Литванија ќе дојде до првата победа на континенталниот собир.

За нашата селекција најефикасен беше Никола Јаничиќ со 21 поен и шест скока, додека Филип Сребров имаше осум поени.

На спротивната страна по 18 поени реализираа Адомас Поциус (шест скокови) и Габриелиус Бубнис.

Првото коло во нашата група ќе се комплетира со вториот меч меѓу Грција и Србија.

Вториот дуел на ЕП избраниците на селекторот Горан Андреевски ќе го имаат в недела од 13.30 часот против грчката селекција.