Трагедиите со кои се соочува српското општество се аларм и за нас како орган на кривичниот прогон и нè принудуваат како институции да се мобилизираме за што поефикасна контрола на оружјето и во нашата земја, апелира јавниот обвинител Љубомир Јовески, кој изрази жалење и со загриженост ги следи настаните во соседна Република Србија.

Барам од сите јавни обвинители во државава, при постапувањето, да инсистираат на построги кривични санкции за кривичното дело – Недозволено изработување, држење и тргување со оружје или распрскувачки материи. Заострувањето на казнената политика мора да се одразува во постапувањето најпрвин на основните јавни обвинителства, кои треба да внимаваат висината на санкцијата за вакви кривични дела да се движи во рамките на законски определниот распон без можност за алтернативна мерка. Покрај ова, вишите јавни обвинителства, во случаите на определена блага санкција со првостепените пресуди, мора да се обидуваат преку постапките во втор степен да издејствуваат повисоки казни, се вели во пораката од Јовески.

Тој смета дека не треба да има ублажување на санкциите, бидејќи кога ќе се земат предвид последиците од недозволено поседување на оружје, тие се огромни.

Оружјето е средство за извршување и на многу други кривични дела и неговата употреба надвор од законските рамки не смее да се толерира, им порача Јовески на обвинителите.

Јовески препорача трендот на намалување на возрасната граница на сторители на тешки кривични дела, што се забележува во другите земји, треба да се примени и кај нас.

Тоа е нешто што загрижува и за што во најскоро време треба да бидат преземени конкретни превентивни активности од сите надлежни институции, додава тој.

Порача дека стои на располагање, ако е потребно Јавното обвинителство активно да го даде својот придонес во секоја евентуално иницирана јавна расправа со цел измена на законските одредби во таа насока.