Осаменоста и сиромаштијата на старите луѓе во Јапонија доведоа до необичен тренд – многу пензионери, посебно жени, намерно го прекршуваат законот за да завршат во затвор, каде што наоѓаат стабилност, основна грижа и друштво, што им недостасува надвор од затворските ѕидови, пишува „https://edition.cnn.com/2025/01/18/asia/japan-elderly-largest-womens-prison-intl-hnk-dst/index.html>Си-ен-ен“.

Во најголемиот јапонски женски затвор, Точиги, 20 отсто од затвореничките се постари жени. Затворот сѐ повеќе се приспособува на потребите на постарата популација, вклучително и помош при капење, хранење и медицинска нега.

„Некои жени велат дека би платиле дури и месечна кирија до 200 долари ако можат да останат тука засекогаш“, вели затворскиот чувар Такајоши Ширанага.

Популацијата во затворот го отсликува стареењето на општеството надвор, како и сеприсутниот проблем на осаменост, кој, според чуварите, станува толку акутен за некои постари затвореници, што тие повеќе би сакале да останат во затворот.

Меѓу затворениците е и Акијо (81), која издржува казна за кражба на храна. Со многу мала пензија и минимална поддршка од семејството, Акијо вели дека животот во затвор ѝ ја дава стабилноста што ја немала надвор.

Според јапонската влада, кражбата е најчестото кривично дело меѓу постарите затвореници.

Повеќе од 80 отсто од постарите жени во затворите во 2022 година биле осудени за кражба. Причините вклучуваат сиромаштија, 20 отсто од постарите од 65 години во Јапонија живеат под прагот на сиромаштија, што е значително повисоко од просекот на ОЕЦД, како и изолација и недостаток на поддршка.

Затворските чувари сведочат дека многу жени се враќаат во затвор бидејќи немаат каде да одат, немаат средства за живот или имаат потреба од медицинска нега што не можат да си ја дозволат надвор од затворот.

Јапонските власти се свесни за проблемот. Министерството за правда започна програми кои им помагаат на затвореничките да се подготват за самостоен живот, додека локалните иницијативи се фокусираат на обезбедување домување и социјална поддршка на стари лица без семејства.

Сепак, со оглед на брзото стареење на населението и ниската стапка на наталитет, многу експерти веруваат дека на Јапонија ќе ѝ требаат значителни ресурси и промени за да се справи со предизвиците што ги носи зголемениот број на стари лица во општеството.