Министерството за образование и наука (МОН) по завршување на локалните избори ќе продолжи со инспекции и контроли во високообразовните установи, најави денеска министерката Весна Јаневска.

Таа информираше дека е затворен приватен факултет за бизнис и економија во Скопје, поради сериозни неправилности во работењето и непостапување по дадените забелешки.

– Направен е увид во оваа институција, каде што беа утврдени бројни неправилности, од кадар до опременост. Им дадовме рок од еден месец да ги отстранат, но не реагираа, а дополнително ги изгубија и просторните можности. Се обративме до Агенцијата за квалитет во високо образование, која потврди дека овој т.н. факултет е нефункционален. Вчера издадовме решение за привремен престанок на неговата работа – појасни Јаневска.

Таа додаде дека досега се затворени 14 приватни научни институти, а ова е првата високообразовна приватна установа која е затворена.

Приватен факултет во Скопје е затворен, му нашле неправилности и не ги поправил

– Се надевам дека дел од високото образование кое не ги исполнува условите ќе пристапи кон самозатворање, ако не, ние ќе ги затвориме – истакна министерката.

МОН вчера соопшти дека поради констатирани нерегуларности во работењето и непостапување по задолжение за нивно отстранување, донесена е одлука за привремено запирање на работата на приватната висока стручна школа – Факултет за бизнис економија во Скопје.