Како што и се најавуваше, тоа денеска и се потврди, македонската кошаркарска федерација ги казни кошаркарските клубови ТФТ и Чаир 2030 за инцидентите и тепачката на пријателскиот натпревар во СРЦ „Кале“ – Скопје кој се регистрира со постигнатиот резултат до прекинот 48:47.

Комесарот за натпреварување во сениорските лиги, Александар Милојевиќ, ги одреди казните за недоиграниот контролен меч кој се играше на 19 септември.

При увидот во документацијата од натпреварот, актите на Македонската кошаркарска федерација, и согласно членот 3 од Законот за спречување на насилство и недостојно одесување на спортските натпревари, донесени се следните одлуки.

Поради слаба организација и непочитување на одлуката на КФСМ и комесарот за натпреварување со која ниту еден официјален натпревар нема да започне без да бидат исполнети четирите услови, односно да биде пријавен во МВР, да има дежурен лекар, да има комесар за безбедност и редарска служба, и да биде целосно сниман, КК ТФТ се казнува со парична казна во износ од 30.000 денари и забрана на настап со публика на домашен терен на два натпревари. Поради учество во тепачка, играчот на ТФТ, Нури Е. се казнува забрана на настап на два натпревари. Поради фрлање тврд предмет кон публиката, играчот на ТФТ Наумовски И. се казнува со забрана на настап на еден натпревар.

Тепачка на кошаркарскиот натпревар меѓу ТФТ и Чаир

Поради остварен физички напад од страна на гледачи, симпатизери на КК Чаир 2030 над противничката екипа околу теренот за време на одигрување на натпреварот, при што натпреварот беше прекинат пред истекот на времето за игра, екипата на КК Чаир 2030 се казнува со парична казна во износ од 48.000 денари и забрана на настап без публика на домашен терен на три натпревари. Поради напуштање на теренот за игра во ситуација која води кон тепачка, помошниот тренер на КК Чаир 2023, Исмаили Е. се казнува со забрана на настап на еден натпревар.

Поради несовесно и неуредено извршување на должност, неуредно и непотполно спроведување на одлуки и упатства од КФСМ и комесарот за натпреварување, делегатот на натпреварот Теофиловски А. се казнува со забрана за вршење на должност на два натпревари.