Предлогот на власта општините да не одат на избори ако градоначалниците станат пратеници и министри откако истуркале половина градоначалнички мандат, а со локалните самоуправи да раководат вршители на должност градоначалници, заглави во Собранието. Власта чека повратен одговор од опозициските ДУИ и СДСМ за предлогот, а опозицијата тврди дека не добила предлог за измени на Законот за локална самоуправа.

Дилемата е дали власта е поблиску до избори за градоначалници во општините Аеродром, Гостивар и во Сарај, откако Тимчо Муцунски и Арбен Таравари станаа министри за надворешни работи и за здравство, а Блерим Беџети стана пратеник. За измена на законот е потребно двотретинско и Бадентерово мнозинство, што без ДУИ е невозможно.

– Предлог-измените ги доставивме до ДУИ и до СДСМ. Немаме повратна информација. Ако сакаат, нека дадат поддршка, но нема да ја молиме ДУИ за двотретинско и за Бадентерово мнозинство. Ако не нè поддржат, ќе одиме на избори – вели пратеник на коалицијата Вреди.

И од ДУИ и од СДСМ тврдат дека во нивните пратенички групи не добиле официјален предлог-текст за измени на Законот за локална самоуправа, туку дека добиле неофицијален предлог и поради тоа не можат ни да коментираат дали ќе обезбедат двотретинско и Бадентерово мнозинство за законот.

Од Вреди се децидни дека немаат намера да се гледаат со ДУИ за поддршка на измените на Законот. Според ова, евентуалната поддршка би требало да ја „брка“ ВМРО-ДПМНЕ, но оттаму нема коментар дали премиерот Христијан Мицкоски ќе бара средба со лидерот на ДУИ Али Ахмети за ова прашање или комуникацијата ќе биде на ниво на пратеници.

Ако ВМРО-ДПМНЕ и Вреди не ја убедат ДУИ да го поддржи законот, тогаш според актуелниот закон, во Аеродром, Сарај и во Гостивар во ноември или декември треба да се одржат вонредни избори за избор на градоначалници. Според Изборниот законик, предвремените избори за градоначалник нема да се распишат ако до редовните избори за градоначалник има помалку од шест месеца, што сега не е случај, бидејќи редовните локални избори се во октомври 2025 година.

Веќе објавивме дека ВМРО-ДПМНЕ ќе се откаже од измените на Законот за локална самоуправа ако има непринципиелен предлог од лидерот на ДУИ Али Ахмети. Иако власта најавуваше усвојување на измените на законот уште пред формирањето на новата влада, Мицкоски тогаш потврди дека ако обезбедат поддршка од опозицијата, предлогот ќе го поднесат по формирањето на владиниот кабинет. Но и по половина месец од формирањето на Владата, нема абер за измени на законот.

Ако има уцени, ќе има и избори за градоначалници

Со измените се предлага да нема предвремени локални избори, ако до завршувањето на мандатот на градоначалникот има помалку од две години и наместо вршител на должноста градоначалник со општината да раководи шест месеци, како што е според актуелниот закон, функцијата да ја врши речиси половина мандат.

Првиот вицепремиер и министер за животна средина Изет Меџити и денеска повтори дека измените на Законот би биле во интерес на граѓаните и на државата.

– Да нема дополнителни трошоци, зашто нема логика во една година двапати да има избори. Само од таа причина ги поднесуваме измените и тие ќе се однесуваат на општини со кои раководат градоначалници и од власта и од опозицијата. Значи, не станува збор дека измените се само во интерес на Владата – рече Меџити.

И додека власта и опозицијата се надмудруваат, во Гостивар е избран досегашниот претседател на Советот на Општината, Ваљбон Лимани, за вршител на должноста градоначалник. На вонредната седница на Советот, против изборот на Лимани гласале само советниците на ДУИ. За ДУИ заминувањето на Таравари за министер е непочитување на волјата на гласачите. Лимани важи за близок соработник на претходниот градоначалник Арбен Таравари.

Прв вршител на должност градоначалник доби Општина Сарај, и тоа на 21 јуни, бидејќи Беџети прв ја напушти градоначалничката функција и на конститутивната седница на Собранието стана пратеник. В.д градоначалник на Сарај е Иљаз Весели.

Општина Аеродром, пак, допрва ќе треба да избере в.д. градоначалник откако Муцунски на 23 јуни беше избран за министер за надворешни работи и надворешна трговија во Владата на Христијан Мицкоски. Со општината сега раководи заменик-градоначалникот Дејан Митески.