Во текот на овие 200 години, два портрети насликани од холандскиот мајстор Рембрант беа целосно непознати за научниците. По нивното пронаоѓање, ова лето тие ќе се продаваат во аукциската куќа „Кристи“, пренесува „Еуроњуз“.

Двата портрети на холандскиот мајстор Рембрант во 1824 година, биле продадени во аукциската куќа „Кристи“. На малите слики потоа им се губи трагот, а нивното постоење беше целосно непознато и за историчарите на уметноста, што е голем превид за опусот на уметник од статусот на Рембрант.

Речиси два века подоцна, меѓународниот заменик-претседател на аукциската куќа „Кристи“ , Хенри Петифер, ги откри портретите кои биле дел од колекцијата на едно британско семејство. Дури ни семејството не знаело дека сликите се направени од големиот мајстор Рембрант.

„Ова е едно од највозбудливите откритија што сме ги направиле на полето на Старите мајстори во последниве години. Портретите се исклучително ретки.“, изјавил Петифер.

Сликите беа идентификувани по опсежната научна истрага и анализа, преземена во „Ријксмузејот“ во Амстердам.

Се работи за слики во висина од 20 см, на кои се претставени портретите на постар пар, кој бил близок со Рембрант и неговото семејство. Тој ги насликал богатиот водоводџија Јан Вилемш ван дер Плујм и неговата сопруга Јапген Карелс, кои живееле во Лајден, родното место на холандскиот сликар.

Се верува дека ова е последниот познат пар портрети на Рембрант, кои останале во приватни раце, а сега тие ќе бидат продадени во аукциската куќа „Кристи“ во Лондон. Се очекува да достигнат цена од околу 5 до 9 милиони евра.