Премиерот Христијан Мицкоски денеска изјави дека првиот вицепремиер на Владата и министер за животна средина и просторно планирање, Изет Меџити, ќе продолжи да ги извршува своите обврски и покрај неговата најавена кандидатура за претстојните локални избори.

„Секој министер има и заменик-министер. Тие не поднесуваат оставка. Нормално е дека ќе ги извршуваат своите обврски во рамки на ресорите каде што се министри и истовремено ќе бидат кандидати“, рече Мицкоски, додавајќи дека ова не е првпат функционери да се кандидираат додека се на јавна функција.

Според премиерот, вакви случаи биле честа пракса и во минатото, не се незаконски и според него нема причина да се очекуваат нарушувања во работењето на институциите.

Распоредот на Меџити станува навистина густ, земајќи предвид дека ќе мора паралелно да ги менаџира и исполнува и министерските и партиските обврски до претстојните локални избори во октомври.