Во рамки на 62-то издание на фестивалот „Струшки вечери на поезијата“ се одржа промоција на „Ново раѓање на зборот: антологија на младата македонска поезија“, издание на „ПНВ Публикации“ од Скопје. Книгата ја приредија Весна Мојсова-Чепишевска и Иван Антоновски.

Во антологијата се застапени 42 автора родени од 1991 година па наваму, а книгата е поделена на три циклуси: „Време е кога бараат од нас / да зборуваме за сечија друга болка / освен за својата“, „те бодам в грло / да исцедиш песна“ и „Во левиот џеб од капутот ја носам / мечтата кон едноставното“.

– И еве, во оваа 2023 година, кога се навршуваат 100 години од раѓањето на Ацо Шопов, таа антологија, и тоа на поетското творештво на авторите родени од 1991 година наваму – се случи. Се чини дека и мораше да се случи токму во оваа година во чест на Шопов, затоа што, од една страна, не само потребно, ами се чини и нужно е веќе во македонската културна стварност да се валоризира и критички да се согледа и опсервира она што е нова вредност на македонската современа поезија остварена од нови поетски гласови. Ама, од друга страна, и заради достојното чествување на делото на Шопов, кој важи за еден од најголемите поддржувачи на младите автори во периодот на педесеттите, шеесеттите и седумдесеттите години на минатиот век – и како поет, и како културен деец, воопшто, вклучително и преку издаваштвото и преку уредништвото во периодиката. (…) Па така, следејќи ги и пораките и пристапот на Шопов, се пристапи кон подготовката на оваа антологија – истакнуваат приредувачите Весна Мојсова-Чепишевска и Иван Антоновски во предговорот на книгата.

Изданието за првпат беше промовирано неодамна во Охрид, во рамки на 35. „Поетска ноќ во Велестово“, а ќе биде промовирано и во Скопје, во рамки на Скопскиот поетски фестивал во втората половина на септември.

(Текстот е објавен во „Културен печат“ број 194, во печатеното издание на весникот „Слободен печат“ на 2-3.9.2023)