Во Галерија МКЦ во Скопје на 18 декември, со почеток во 19 часот, ќе се одржи промоција на романот „Леска Брезоска“ од Симона Јованоска. Романот е во издание на „Или-или“ и е книга бр. 232 во едицијата „ПРОаЗА“. Промоцијата ќе се одвива низ разговор на уредникот Ненад Стевовиќ со авторката.

„Леска Брезоска“ е втор роман на Симона Јованоска по дебитантскиот „Денот на црвот“ со кој ја освои престижната награда „Роман на годината“ за 2021 година.

Приказната во „Леска Брезоска“ се одвива во Гостивар и во Скопје и ја следи животната патека на главната хероина од нејзиното детство, првите игри, детските трауми, другарувања, откривањето на сексуалноста, соочувањето со етничките тензии и немири, па сѐ до влегувањето во светот на возрасните и судирот со комплексните животни околности и борбата за нивното надминување.

Романот е составен од меѓусебно испреплетени животни приказни сочинувајќи една кохерентна и заокружена целина, а милјето во коешто се одвиваат е македонската општествена реалност од последниве децении.

Симона Јованоска е родена во 1985 година во Гостивар. Во родниот град завршила средно економско училиште, а потоа Економски факултет во Скопје, отсек маркетинг.

Во 2015 година ја објавува дебитантската книга раскази „Ги најдов во длабокото“ во издание на „Или-или“. Во 2019 година ја добива втората награда на конкурсот на дневниот весник „Нова Македонија“ за расказот „Последниот кат“, а во 2022 година е првонаградена за расказот „Кажи му на кучето“.

Дебитантскиот роман „Денот на црвот“ („Или-или“, 2021, 2022, 2024) е прогласен за „Роман на годината“ за 2021 година од Фондацијата „Славко Јаневски“ и е преведен на бугарски, српски и хрватски јазик.

Во 2022 во издание на „Чудна шума“ Симона Јованоска ја објави книгата за деца „Градот Вабу и потрагата на Нави“, известија од „Или-или“.