Ново издание на Издавачкиот центар „Три“ е романот „Невидливите бесови на срцето“ од ирскиот писател Џон Бојн, кој зборува за љубовта низ призмата на различна сексуална ориентација.

Преведен од англиски јазик од Горица Попова, овој роман е уште една современа приказна од авторот познат на читателите по делото „Момчето во пижами на риги“.

„Привлечен и скандалозен, романот претставува парадоксална одисеја на еден обичен човек и на една цела нација, залутани во времето. Посвоениот Сирил завршува кај една богата ексцентрична двојка кај која ништо не му недостига. Освен љубов. Тој е изгубен во светот и единствената светла точка во неговото детство се запознавањето со необичното момче Џулиен и љубовта кон него“, стои во описот на делото.

Џон Бојн е роден во Даблин, Ирска, во 1971 година. По шеснаесет романи за возрасни, шест романи за деца и млади, две новели и една збирка раскази, денес во книжевниот свет е познат како писател на меѓународни бестселери.

Од Издавачкиот центар „Три“ дополнуваат дека Бојн во секое свое дело на изнемоштените и навидум безнадежни книжевни ликови им дава шанса да се пробијат до излезот, не преку барање на светлината како патоказ, туку со тоа што самите стануваат светилник.

Романот е објавен во едицијата „Нашите приказни“, поддржана од Европската Унија. Со книгите од овој проект „Три“ имаат за цел до македонските читатели да ги доближат европските популарни автори и книги, кои веќе имаат свое место во светската литература, поттикнувајќи позитивни промени во светот.