Издавачката куќа „Гаврош“ во кафе „Горки“ го промовираше проектот „Драми од Мартин Мекдона“. Станува збор за „Трилогија Линејн“, која ги содржи драмите „Мис на Линејн“, „Череп во Конемара“ и „Осамениот запад“ во превод на Горјан Милошевски и на Јане Спасиќ. Промотор на изданијата беше Милан Дамјановски.

Додека на филмската публика Мартин Мекдона ѝ е познат како режисерот на „Три билборди пред Ебинг, Мизури“, „Во Бруж“, „Седум психопати“, преку „Трилогија Линејн“ читателите имаат прилика да го запознаат Мартин Мекдона како драмски автор.

Тој е британски драмски автор, сценарист, театарски и филмски режисер со ирско потекло. Драматуршкото творештво на Мекдона поради својата комплексност, длабинската вивисекција на општеството и поединецот, како и жестокиот јазик, секогаш претставуваат голем предизвик за превод. Ова издание на преводи на драмите на Мекдона овозможува целосно да се согледа и да се ужива во неговото авторство, неговите идеи, а што е најважно да се зачува неговата оригинална авторска намера на македонски јазик.

Преведувачите на неговите драми, драматургот Горјан Милошевски и театарскиот режисер Јане Спасиќ, ги сублимирале своите искуства од читањето на текстот и од неговото поставување на сцена во заеднички превод.

(Текстот е објавен во „Културен печат“ број 150, во печатеното издание на весникот „Слободен печат“ на 15-16 октомври 2022)