Италија лансираше специјален ноќен воз со вагони за спиење што ги поврзува Рим и Минхен, нудејќи им на патниците уникатно искуство – баварска музика, свежо пиво и традиционална храна уште на пат кон познатиот Октоберфест.
Овој воз, наречен Минхен Експрес работи во рамките на италијанската државна компанија FS Treni Turistici Italiani. Станува збор за посебна линија со баварска тематика што им нуди на патниците незаборавно 16-часовно патување со танцување, пиво и вечера во возот- објави Бизпортал.

– Заборавете на стресот од возењето и непотребните запирања. Со нас, забавата започнува веднаш штом ќе се качите на возот – се наведува во соопштението за медиумите на операторот.

Патниците можат да уживаат во традиционални закуски, свежо сварено пиво и баварска музика, пред да се повлечат да спијат во седиштата, вагоните со купе или вагоните за спиење.

Обожавателите на Октоберфест можат да резервираат кабини за едно или две лица, или кабина со четири кревети за целото семејство, додека самиот пат води низ прекрасни пејзажи: Фиренца, Верона, Болоња и Алпите.

Оваа специјална линија сообраќа само двапати – на 26 септември и 3 октомври. Возот тргнува од станицата Термини во Рим во петок во 20:00 часот и пристигнува во Минхен следниот ден во 14:30 часот. Враќањето од Минхен е во недела во 14:30 часот, а пристигнувањето во Рим во понеделник во 06:30 часот.

Патниците можат да влезат и од други градови, како што се Тренто, Верона, Бриксен, Болкан, Випитено, Фортеца, Бренер и Кола Исарк. Цените за „Минхен Експрес“ по повод Октоберфест почнуваат од 99 евра во еден правец, а билетите може да се резервираат преку платформата Railbook.

Оние кои веднаш ќе резервираат повратен билет ќе платат по 89 евра во секој правец. Иако Италија вложува напори да го промовира патувањето до Минхен за Октоберфест, многу туристи го избираат Октоберфест во Берлин оваа година, сакајќи да ги избегнат големите гужви во Минхен.