Италија и Албанија се подготвуваат да потпишат договор за подводна интерконекција за обновлива енергија што ќе ги поврзе двете земји преку подводен кабел во Јадранското Море.

Тоа денеска го соопшти италијанската премиерка Џорџа Мелони од Абу Даби, за време на конференција за енергетика.

Албанскиот премиер Еди Рама преку објава на социјалните мрежи појасни дека врската ќе има тројна сопственост и ќе се потпира на значителни заеднички инвестиции во зголемувањето на производствените капацитети на Албанија.

Шефот на албанската влада додава дека ваквиот чекор доаѓа во пресрет на целите Албанија да се осамостои од увозот на струја и наскоро да стане земја извозник во ЕУ.

„Поздрав од Абу Даби, ќе поставиме пресвртница на патот кон нашата енергетска независност. Заедно со премиерката на Италија, мојата драга пријателка Мелони, на покана на претседателот на Обединетите Арапски Емирати, го финализираме трилатералниот договор за подводно енергетско поврзување меѓу Албанија и Италија, како и зголемување на производството на соларна енергија во Албанија. Интерконекцијата ќе има тројна сопственост и ќе се потпира на значителни заеднички инвестиции во зголемување на производните капацитети на нашата земја. Ова е во функција и на амбицијата да се осамостоиме од увозот, но ни дава и улога како извозник во ЕУ наскоро. Денес, Албанија е земја со најголем капацитет на индивидуални или деловни производители на соларна енергија во регионот. Енергијата произведена од сонцето се искачи од 0 на 10 отсто од домашното производство. Планот е да достигнеме 30 проценти во нашиот четврти мандат“, објасни Рама во видеото.

Тој додаде дека Албанија е единствената земја во регионот која не ја зголеми цената на енергијата за време на европската криза 2022-2023 година, а од 1 февруари и официјално ќе стане единствената европска земја која ја намалува цената на енергијата за 10,5 отсто.