Интервју со Марија и Јелена Чокреви: Првите резултати од пилатесот се видливи по еден месец
Од љубов кон вежбањето до создавање инспиративен простор за вежбање – така почнува приказната на Јелена и Марија Чокрева, снаа и золва, кои во 2019 година го отворија студиото „Пилатес поинт“ во скопската населба Тафталиџе 1. Денес тие се не само сопственички, туку и сертифицирани инструкторки и двигатели на една мала, но цврсто изградена заедница на жени што сакаат да се грижат за своето тело и ум. Со часови по активен пилатес, функционален фитнес и зумба, „Пилатес поинт“ стана препознатливо место меѓу оние што сакаат да имаат убава физичка активност во своето секојдневие.
Препорачано
Во разговор за „Слободен печат“, Јелена и Марија раскажуваат како изгледале нивните први чекори во пилатесот, што значи да се води семеен бизнис и зошто пилатесот е совршена почетна точка за секој што сака да почне со вежбање.
Јелена и Марија, дали се сеќавате на моментот кога првпат застанавте на простирка за пилатес? Какво беше чувството и што ве привлече да продолжите понатаму?
– Марија: Првпат застанав на простирка за пилатес па можеби во седмо или осмо одделение. Тоа време сестра ми ме земаше заедно со неа каде што вежбаше и држеше часови. Иако бев мала и не многу задлабочена во вежбањето, имаше нешто во вежбите, во различните реквизити, кој со отпор, кој со тежина, во начинот на кој течеа часовите и ми се тресеше цело тело, а сепак не се чувствував истоштено, напротив, исполнето и тоа е она што ме влечеше да ѝ додевам повторно да ме земе.
Јелена: Првпат се запознав со пилатесот пред 15 години и како некој што од рано детство е вклучен во спортот, морам да признаам дека пилатесот ме освои од прв момент. Кај пилатесот кој е навистина специфичен начин на вежбање најмногу ми се допадна смиреноста што ја бара, концентрацијата на дишењето и на движењето и најмногу од сè ме фасцинираше тоа што со една навидум едноставна вежба се активираат толку различни мускулни групи. Бидејќи покрај пилатесот уживав и во аеробик и во кардио тренинзи, кај нас во студио вежбаме активен пилатес, кој не е како класичниот пилатес, туку е микс од пилатес, фитнес и кардио вежби, кои заедно во целина даваат навистина одлични резултати.
Кога и како се појави желбата да не бидете само вежбачи, туку и инструкторки? Како се роди идејата да го отворите Вашето студио за пилатес?
– Прво дојде вљубувањето во вежбите, па целата атмосфера на групните часови и како тие ни правеа да се чувствуваме одлично секој пат. Потоа дојде заменувањето по некој час и кога веќе еднаш ќе застанеш во улога на инструктор и сфаќаш колку убаво ти доаѓа кога ќе ги видиш сите среќни и задоволни лица на вежбачите по извежбаниот час, значи има нешто тука што треба да се истражи и да се продлабочи.
Нормално, и двете знаевме дека сакаме да имаме нешто свое, да можеме да работиме на наш начин и да ставиме наш печат. Кога увидовме за колку работи исто размислуваме, го направивме првиот најтежок чекор, ја донесовме одлуката дека ќе отвориме студио, па сѐ останато понатаму веќе беше полесно.
Интересно е дека „Пилатес поинт“ е семеен бизнис – вие сте снаа и золва. Како функционирате во секојдневното работење и колку таа динамика ви помага или одмага?
– Да, „Пилатес поинт“ е семеен бизнис и може да кажеме дека одлично функционираме од самиот почеток. И покрај тоа што двете сме доста различни карактерно, нашите визии и размислувања за бизнисот се исти. И многу е полесно кога работиш со некој во тим бидејќи постојано имаш некој што ти го чува грбот. Низ овие 6 години сме поминувале и двете низ различни животни фази, но она што секогаш е исто е тоа дека во секој момент сме биле тука една за друга, ако почувствуваме дека едната е презаситена, другата презема повеќе обврски, постојано меѓусебно се мотивираме за да дадеме најдобри можни услуги и услови за нашите драги вежбачки.
Како би му го објасниле пилатесот на некој што мисли дека не е „доволно во форма“ за да почне?
– Сме го слушнале овој коментар безброј пати, па секогаш се обидуваме да ги мотивираме оние што се чувствуваат така со тоа што им велиме дека најтешкиот дел е да дојдат и да се обидат. Сите ние сме се нашле во различна доба од животот каде што сме излегле од форма, но според нас, пилатесот е една елегантна дисциплина, која е одлична за да ве „намами“ повторно да влезете во светот на вежбањето. Не велиме дека е лесна, но не е агресивна и се фокусира токму на наоѓање начини и потребни модификации за секој еден поединец да може да изведе вежба и да има придобивка од тоа. Еден од главните фокуси на пилатесот е јадрото, а со зајакнување на јадрото полека се губат и болките во грбот, придонесуваат за подобро држење на телото и полесно движење, а тоа е она што треба секој да го постигне во денешно време, особено доколку работата вклучува долгочасовно седење.
Кои се најчестите заблуди што ги имаат луѓето за пилатесот и што реално можат да очекуваат од оваа физичка активност?
– Мораме да признаеме дека порано имаше многу повеќе заблуди за пилатесот, дека е лесна дисциплина, дека е само „тегнење“, дека пилатесот е само за рехабилитација и слично, но полека се напуштаат овие стереотипи. Сите оние што практикуваат пилатес уште во првиот месец ќе почувствуваат зајакнување на јадрото, подобрено држење на телото, флексибилност, рамнотежа и координација, секако зајакнување на сите мускули, но на начин тоа да изгледа елегантно и женствено. И секако како топ приоритети што произлегуваат од вежбањето, би ги издвоила намалување на болките во грбот, подобрување на сонот и инстантно подобрување на расположението по секој извежбан тренинг.
Колку време е потребно за да се почувствуваат вистински резултати од пилатесот и какви резултати најчесто се јавуваат први?
– Како и во секоја друга дисциплина, така и кај пилатесот за да се види каков било резултат од вежбите, најпрво е потребна дисциплина и редовност, а потоа и совладување на правилна форма и свесно изведување на вежбите. Кога ќе кликне моментот на поврзаност на умот со секое едно мускулче што треба да го активираме за време на вежбата, тогаш почнува и појавата на резултатите. Реалната процена според нас, минимум еден месец е потребен за да се почувствува разлика. Кај нашите клиенти најчесто првите резултати се постигнати кога некој ќе искоментира дека повеќе не го боли грбот, вратот, и тука знаеме дека стомачните и грбните мускули се зајакнале, или кога некој веќе посегнува по текчиња бидејќи вежбите со сопствена тежина му се чинат полесни, а тоа најчесто значи дека веќе има убава дефиниција на мускулите и на нозете и на рацете.
Колку е важна исхраната како дел од процесот? Дали давате совети и во тој правец или секој има свој пристап?
– Исхраната е многу, многу важен дел од процесот од повеќе причини. Пред сè исхраната е клучна за да му овозможиме на нашето тело хранливи состојки за да може правилно да функционира, а од сето тоа произлегува во текот на денот да имаме повеќе енергија, да го зајакнеме имуниот систем, да избегнеме хронични заболувања. Правилната исхрана искомбинирана со вежбање овозможува изградба на мускулната маса, намалување на килограми (за оние на кои тоа им е целта), подобар перформанс за време на тренингот и побрзо закрепнување на мускулите по вежбање. Ако нашите вежбачи го побараат тоа од нас, ние сме тука секако да ги посоветуваме и да им дадеме општи насоки, но персонализираните планови за исхрана за различни здравствени цели ги препуштаме на стручните лица.
За крај, како би ги измотивирале читателите на „Слободен печат“ што сакаат да почнат со пилатес како физичка активност, а подолго време си велат „од утре“?
– Физичката активност сметаме дека е неопходна и мора на некој начин да биде вклучена во секојдневниот живот. Не се сите страсни љубители на вежбањето, тоа е нормално, но ги охрабруваме сите што сѐ уште не ја нашле физичката активност што најмногу им одговара, да почнат да истражуваат, да пробуваат и да не се откажат додека не ја најдат онаа дисциплина што нема да ја гледаат како обврска, туку како уживање. Во нашиот случај тоа е активниот пилатес, комбинација од класичните пилатес вежбите, фитнес вежби и кардио и ова не би го менувале за ништо, за некој можеби ќе биде нешто друго, но најбитно е да се пронајдеме во нешто и тоа да прерасне во една долгогодишна традиција на негување на телото и умот.
