Под насловот „Црвен конец, црн конец – катранка“, група млади писатели и креативци се впуштаат во истражување на една од најпознатите кратки народни усни творби – гатанката.

Во Градската библиотека „Браќа Миладиновци“ – Скопје на 16 јуни ќе се одржи мултимедијалниот интерактивен перформанс „Црвен конец, црн конец – катранка“ посветен на гатанката и афирмацијата на народното творештво. Поради временските услови работилницата ќе се одржи во спомен-собата „Т’га за југ“, со почеток во 19 часот.

Авторите кои го создаваат овој перформанс тргнуваат од првобитната намена на гатанката и нејзината педагошката функција, за да стигнат до нејзиниот забавен карактер. За нив гатанката е форма која ја поттикнува и ја става на тест човечката креативност, покажувајќи ја својата улога во фолклорот.

Интеракцијата се добива кога водителите поставуваат гатанка, а одговорот го дава публиката. Тоа е основата за вториот дел од настанот: одговорот на гатанката е проследен со читање поетска творба чија тема е токму решението на гатанката. Перформансот завршува со преслушување македонска чалгиска музика.

Во перформансот „Црвен конец, црн конец – катранка“ учествуваат Софија Тодороска, Пепи Стамков, Светла Јакшиќ и Емануела Ковачевска Китановска.

Градската библиотека „Браќа Миладиновци“ – Скопје, како едно од главните културни јадра во градот и пошироко, останува отворена и во поддршката на младите творци и креативци, кои токму во библиотеката наоѓаат свое средиште и простор за изразување.