Чилеанскиот репрезентативец Алексис Санчез наскоро ќе мора да побара нов клуб, пренесува новинарот Николо Скира.

Раководството на Интер сака да го раскине договорот со 33-годишниот напаѓач и е подготвено да му плати на играчот пет милиони евра.

Договорот на Санчез со Интер трае до летото 2023 година, но очигледно не е во плановите на тренерот Симоне Инѕаги, кој следната сезона ќе го има на располагање Ромелу Лукаку, кој се врати од Челси на стадионот „Џузепе Меаца“.

Чилеанецот минатата сезона одигра 27 натпревари во италијанскиот шампионат и запиша пет гола и две асистенции.

Француските медиуми пренесуваат дека тој би можел да ја продолжи кариерата во Олимпик од Марсеј.

Искусниот фудбалер во 2019 година дојде во Интер на позајмица од Манчестер јунајтед. Претходно играше и за Кобрело, Удинезе, Коло Коло, Ривер Плата, Барселона и Арсенал.