Периодот на социјална и на физичка изолација во изминативе два месеца секој човек го чувствува и го доживува на свој начин. Историчарот на уметност и виш кустос во Музејот на современата уметност во Скопје, Благоја Варошанец, сепак забележал поинаква визура на градот Скопје, каде што е роден и живее, и почнал благороден истражувачки проект. Сосема спонтано почнал да трага по уметнички дела и факти кои се распослани низ градот, а со текот на времето веќе никој не ги забележува.

– Промените што ги донесе пандемијата на коронавирусот иницираа формирање на град со една поинаква димензија, како онаа во 80-тите години на минатиот век, кога растев. Град во кој сѐ стана побавно и сите убави работи, па и оние што не знаевме дека постојат, како да излегоа на виделина. Го нема повеќе стресот и рутата да се стигне од место А до место Б, за побрзо да се завршат дневните обврски. Полупразни улици, бавна прошетка, тивок призор, сите убавини и уметности.

Секојдневно, во тие попладневни прошетки во Скопје, или возења со велосипед, преку мојот објектив, ловев по еден или повеќе нови, помалку заборавени спомени на градот. По неколку денови решив, овие приказни и тајни фрагменти на градот, да ги споделам со моите пријатели и да ги вратам аналогно во едно време и простор кога сѐ беше поедноставно – објаснува Варошанец.

Фотографиите со дела кои ги наоѓа низ градот ги објавува на својот личен профил на Фејсбук. Самоизникнатиот проект го нарекол едноставно – Skopje Secret Spots. Како и да го преведеме насловот, секако е јасно по што трага Варошанец, со тоа што делата што ги пронаоѓа излегуваат надвор од неговото време на живеење во и со градот.

– Од една ваква идеја произлезе сериозно едукативно истражување. Спомените со текот на времето ги изгубиле своите легенди и условно се заборавени, па беше голем предизвик и задоволство да се најдат информации за секој следен пост.

Во текот на изминативе месеци собрав доволно материјал за секој ден да објавувам нов заборавен фрагмент од уметничкото богатство на градот во наредните два месеца. Не би знаел да кажам колку ќе трае проектов, бидејќи Скопје е магичен град, полн со „тајни места“ и инспиративна просторна единственост – вели Варошанец.

Секој што го посетил фејсбук-профилот на Варошанец сигурно ќе биде изненаден од фактот што навистина постојат толку многу заборавени места и уметнички траги низ Скопје. Покрај дел од нив поминуваме секојдневно, но не ги забележуваме. Токму затоа ќе биде добро на Варошанец да му дадеме поддршка во неговата мисија, ако не со друго, тогаш барем со лајк на неговиот профил.

(Текстот е објавен во „Културен печат“ број 32, во печатеното издание на „Слободен печат“ на 23-25 мај 2020)