На првата трка од серијата на Ултра маратони која се одржа во Робервал (Канада), на езерото Сен Жан, македонскиот пливач Александар Илиевски го освои третото место со време 7:18.48 часа.

Вториот наш претставник Евгениј Поп Ацев го зазема четвртото место со време 7:53.15.

Победник во машка конкуренција беше пливачот од Италија, Едуардо Стокионо со време 6:55.04.

Кај жените пливачката од Франција, Дорник Моргане ја освои првата позиција со време од 7:19.08 часа.

Од вкупно девет пливачи во машка конкуренција пет ја завршија трката.

– Конечно подиум на едно големо натпреварување од светски рамки. Освоено трето место на еден од најтешките маратони во мојот живот. По км и не е многу само 32км, но температурата на водата и условите навор, ветерот брановите го прават маратонот да биде уште потежок. За првпат мислам дека дадов над 100% од мене. Успев да се справам со хипотермијата на телото која ја имав првите три часа, ја пребродив психички кризата и успеав. Пресреќен сум, затоа што овде ретко кој ја има таа чест да се качи на подиум. После Теодора Раптис, Томи Стефановски и Евгениј Поп Ацев и јас ја имав таа чест за првпат да се качам на подиум тука во Канада – рече Илиевски по завршниот маратон во Робервал.