Поранешните министри за финансии, за економија и за правда – Фатмир Бесими, Крешник Бектеши и Кренар Лога – се новите ексфункционери кои ќе користат апанажа. Бесими и Бектеши една година ќе земаат по околу 2.000 евра плата, додека Лога ќе зема буџетски пари девет месеци, бидејќи има помал министерски стаж од колегите. Комисијата за избори и именувања денеска ги одобри овие барања за апанажи за поранешните министри.

Претходно, апанажа беше одобрена и за ексвицепремиерот за евроинтеграции Бојан Маричиќ и министерот за образование Јетон Шаќири, а Комисијата позитивно одговори и на барањата на 36 поранешни пратеници.

Османи ќе оперира, Груби ќе предава, а Маричиќ и Шаќири – на апанажа!

Комисијата, исто така, го одобри и барањето поранешната генерална секретарка на Собранието, Цветанка Иванова, за отпремнина при заминување во пензија. Одобрено е и барањето на Ристана Лалчевска од Државната комисија за одлучување во втор степен во областа на инспекцискиот надзор и прекршошната постапка. Таа побара да и се продолжи правото на плата по престанокот на функцијата на шест месеци, до остварување на правото на пензија.

Бобан Стојановски, член на Државната изборна комисија денеска беше избран за заменик генерален секретар на Собранието. Изгласани беа и барањата за закупнина на стан на пратениците Даниела Христова, Грација Бакрачевска, Јован Јаулески и Јованка Тренчевска.

Очекувањата се дека до истекот на рокот за поднесување на барање, на апанажа ќе бидат најмалку 50 поранешни функционери. Надоместокот, во согласност со Законот, е во висина на платата што именуваното лице ја добивало додека било на функцијата.

Претходно, по формирањето на техничката влада, правото на апанажа го остварија експремиерот Димитар Ковачевски и ексминистерот за внатрешни Оливер Спасовски. Апанажата им беше прекината откако на двајцата им беше верификуван пратеничкиот мандат. Ковачевски и Спасовски земаа месечно по 2.500 евра.