Хрватскиот сабор денеска со мнозинство гласови го одби признавањето на Палестина, објави хрватски „Индекс“.

Мнозинството во Саборот (хрватското собрание) изгласа заклучок со кој се повикува Владата, следејќи ги меѓународните мировни напори и иницијативи, да го процени вистинскиот момент за донесување одлука за признавање на палестинската држава, како дел од сеопфатните напори за постигнување мир и решение со две држави, наместо да се признае Палестина.

Ова беше направено на предлог на клубовите на парламентарното мнозинство, чиј заклучок доби 74 гласа „за“, 41 „против“, а тројца беа воздржани.

Од друга страна, пак, заклучокот што го предложи клубот „Можемо“, со кој се бараше Саборот да ја обврзе Владата во рок од 15 дена да подготви Одлука за признавање на државата Палестина, не помина. За таквата одлука, што де факто ќе значеше признавање на Палестина, гласаа 44 пратеници, против беа 73, а четворица беа воздржани.