Хрватскиот министер за економија Анте Шушњар денес изјави дека Хрватска е подготвена да ја купи Српската нафтена индустрија (НИС) доколку тоа е решението, јавува Нова.рс.

„Нашата рака е подадена, ако тоа е решението, подготвени сме и за таа опција“, изјави Шушњар пред новинарите, коментирајќи го воведувањето на американските санкции врз НИС.

Тој рече дека на овој начин ќе се обезбеди континуитетот и деловните интереси на Јадранскиот нафтовод, кој е тесно поврзан со НИС веќе 40 години, „без никакви претензии да доминира на малопродажниот пазар во Србија“.

„Тоа би ни олеснило и нам и на Србија“, додаде хрватскиот министер, кој доаѓа од десничарското Татковинско движење, малцински партнер во владата на премиерот Андреј Пленковиќ во Хрватската демократска заедница (ХДЗ).

Тој додаде и дека рафинеријата во Панчево снабдува 20 проценти од пазарот на деривати во БиХ.

„Ова е дополнителен предизвик за БиХ и до крајот на месецот очекуваме да заврши модернизацијата на рафинеријата во Риека, што би го зголемило капацитетот и на тој начин би можеле да ѝ помогнеме на БиХ, а делумно и на Србија“, додаде Шушњар, објави Хрватската радиотелевизија.

Тој ги отфрли проценките дека случувањата со НИС и санкциите ја загрозуваат позицијата на Хрватска во преговорите со МОЛ за снабдување на Унгарија и Словачка со доволни количини нафта.

Министерот рече дека Хрватска е подготвена да испорача доволни количини нафта на Унгарија, Словачка и Србија кога околностите и геополитичките услови ќе дозволат.