Амбасадорот на САД во Косово, Џефри Ховениер ја осуди средбата на амбасадорот на Србија во Вашингтон, Марко Ѓуриќ со поранешниот потпретседател на Српска листа, Милан Радоичиќ, кој ја презеде одговорноста за терористичкиот напад во Бањска, во северно Косово, во кој загинаа еден косовски полицаец и тројца од напаѓачите.

Откако медиуми објавија фотографија од средба на Ѓуриќ со Радоичиќ, по кого е распишана меѓународна потерница од Интерпол, Ховениер нагласи дека ставот на Вашингтон во однос на Радоичиќ е непроменет и потсети дека тој е под санкции на американската влада поради неговите криминални активности.

– Ние сме запознаени со медиумските извештаи за наводната средба, ставот на САД за Радоичиќ е познат. Радоичиќ е под санкции на американската Влада поради вмешаност во корупција и транснационален организиран криминал, изјави Ховениер.

Тој го повтори барањето на  Вашингтон до властите во Србија да ги изведат пред правда одговорните за нападот во Бањска.

– Србија мора да ги повика на одговорност оние кои се вклучени во нападот извршен од паравоените сили на етничките Срби во Бањска, што резултира со трагичната смрт на наредникот на косовската полиција. Одговорноста за нападот во Бањска (Радоичиќ) ја презеде преку своите адвокати. Тој е криминалец кој мора да одговара – изјави американскиот дипломат за „Експрес“.

Актуелниот амбасадор на Србија во САД, Марко Ѓуриќ се споменува како кандидат за формирање на новата влада на Србија. Ѓуриќ ја потврди средбата и рече дека „тоа е поврзано со работата“, а објавувањето на фотографијата оцени дека е поврзано со неговото враќање во политиката во Србија.

Радоичиќ, кој призна дека е одговорен за нападот во Бањска, беше приведен од српската полиција, но по неколку дена Вишиот суд во Белград го ослободи од притвор.