Холандскиот селектор Роналд Куман изјави дека е шокиран од настапот на неговата репрезентација во првата недела од неговото враќање на чело на националниот тим и дека неговите фудбалери кои ги очекува полуфинале на Лигата на нации против Хрватска, треба драстично да ја подобрат играта.

Тоа не беше враќањето што Куман го бараше на почетокот на неговиот втор мандат на чело на тимот, откако го замени Луј ван Гал, бидејќи Холанѓаните не ги започнаа најдобро квалификациите за ЕП 2024.

– Мораме да се подобриме, прилично сум шокиран од она што го видов – вели Куман.

Минатата недела поради вирусот пет играчи се откажаа од патувањето во Париз, каде Франција убедливо славеше со 4-0, а потоа во понеделникот Холанѓаните го совладаа Гибралтар со 3-0 и упатени 49 удари кон противничкиот гол. Куман не го криеше своето незадоволство.

– Не беше добро, прилично сум разочаран. Навистина мора да биде подобро. Мораме да бидеме во добра форма бидејќи ова беше навистина премалку. Беше лоша недела, многу играчи се разболеа на почетокот. Тежок пораз од Франција, а не беше доволно ниту против Гибралтар. Наскоро ќе мора да се подобри. Никогаш не сум имал таква недела во мојот претходен тренерски мандат и се надевам дека нема да се повтори – им рече Куман на новинарите.

Холанѓаните ќе мора да направат голем исчекор напред, во јуни се домаќини на завршницата во Лигата на нации. Тие играат со Хрватска во Ротердам на 14 јуни, а четири дена подоцна во финалето или во мечот за третото место ќе се соочат со Италија или Шпанија.