Холандскиот амбасадор во Македонија, Дирк Јан Коп се приклучи на ставот на Европската комисија за измените во Кривичниот законик и загриженоста од нивното „забрзано“ усвојување со што се намалуваат максималните законски казни, а ќе има и импликации врз примената на застареноста, како и влијание на голем број случаи на корупција на високо ниво, холандскиот амбасадор во Скопје се приклучи „загриженоста“.

– Амбасадата на Холандија многу сериозно ги следи последните случува во однос на измените на Кривичниот законик и целосно се согласува со изјавата што ја објави ЕУ – вели холандскиот амбасадор Јан Коп во кусата изјава за „Слободен печат“.

Портпаролката на Европската комисија, Ана Писонеро веќе изјави дека во Комисијата изразуваат жалење поради недостатокот на сеопфатни консултации на домашните чинители со Брисел пред нивното усвојување, како и за употребата на европско знаменце која според ЕУ, треба да биде конзистентна и јасно поврзана со законите кои првенствено имаат за цел усогласување на националното право со европското законодавство.

– Северна Македонија се обврза да го промовира владеењето на правото и да се бори против неказнивоста и затоа санкциите за корупциски активности мора да бидат ефективни, пропорционални и разубедувачки – вели Писонеро.

Според неа, зајакнувањето на довербата во правосудниот систем и несмаленото справување со корупцијата, вклучително и преку солидна истрага, како и гонењето и конечното осудување на случаите на корупција на високо ниво е од клучно значење.

И додека ЕУ упатува јасни пораки за измените на Кривичниот законик Владата се обидува да го оправда нивното носење. Министерот за надворешни работи Бујар Османи вчера во Брисел рече дека на средбите што ги имал објаснил оти тие промени се во рамки на усогласувањето со европската легислатива, при што одредени измени што беа предмет на јавната дебета не се од сега, туку се провлекуваат со години како прашања што отстапуваат од европското право и како тврди решенија кои не даваа можност за имплементирање на правната држава поради ригидната поставеност на одредбите од Кривичниот законик.

– Сега според објаснување на сите експерти, со измените Законот станува пофлексибилен и подинамичен и се става фокус на незаконски стекнатиот имот, но и дава можност судиите побрзо да ги завршат предметите. Сето тоа ќе доведе до една нова динамика во судството која ја очекуваат граѓаните. Знам дека заради контекстот има конспиративни теории дека ова е поврзано со уставните измени. Но, не е поврзано со нив, туку е прашање кое се провлекува низ годините и ќе овозможи динамичност, флексибилност и брзи одлуки во судството, токму во интерес на владеењето на правото – изјави Османи.

Претходно премиерот Димитар Ковачевски практично ја демантираше Европската комисија и уверуваше дека со Европската Унија се разговара на дневно ниво и се обиде да ги оправда измените во Кривичниот законик.

– Тоа што ние претходно имавме закон во којшто казните беа, би рекол од некое комунистичко време и беа направени од еден ‘Дарт вејдер’ на македонското судство, не значи дека тие работи не треба да се променат – додаде Ковачевски.

На забелешка од медиумите дека Европската комисија изразува жалење поради употребата на европското знаменце во процедурата за усвојувањето на измените на Кривичниот законик, Ковачевски рече дека во ставот на Брисел никаде не се наведува дека е злоупотребено, туку дека е употребено знаменцето на ЕУ.

– Европската Унија не кажа дека е злоупотребено, туку дека е употребено европското знаменце, во детали ја прочитав нивната изјава. Се покажа дека законот е веќе донесен и ништо драматично не се случи. Тоа значи дека не бил правен наменски за нешто или за некого туку дека е правен за подобрување на системот – додаде тој.

Инаку, измените на Кривичниот законикстапуваат на сила утре, откако беа објавени во Службен весник на 7 септември, веднаш откако претседателот Стево Пендаровски го потпиша Указот. За повеќето измени е наведено дека ќе почнат да се применуваат по шест месеци, но не и измените на делата за злоупотреба на службената положба, кои ќе почнат да важат веднаш.

ЕУ загрижена за измените на Кривичниот законик, амбасадата на САД сѐ уште ги разгледува