Хибрид од волк и куче уби тримесечно дете во Челзи, Алабама, соопшти полицијата. Семејството на несреќното дете го чувало животното како домашно милениче. Ветеринар го еутанизирал животното на местото на настанот, потврди Канцеларијата на шерифот на округот Шелби.

Градоначалникот смртта ја нарече „несреќна и трагична“. „Потврдено е дека едно од нашите деца овде во Челзи беше убиено од егзотично милениче и дека детето им подлегна на повредите вчера попладне откако беше пренесено во болница“, рече градоначалникот Тони Пиклесајмер.

Полицијата соопшти дека во четвртокот околу 13 часот по локално време биле повикани во домот на детето, откако добиле дојава за напад на животно. Детето потоа било пренесено во болница, каде што била констатирана смрт од повредите здобиени во нападот, пишува Би-Би-Си.

Полицијата го опиша животното како „хибрид волк-куче“ што семејството на бебето го чувало како домашно милениче. Оттаму додаваат дека продолжуваат да ги истражуваат околностите кои довеле до смртта на детето. Градоначалникот Пиклесајмер изјави за Си-Би-Ес дека во куќата во моментот на инцидентот имало и други деца.

Сличен инцидент се случил и во 2018 година, кога осумдневно бебе починало откако било нападнато од исто вакво животно. Инаку, според Меѓународниот центар за волци во Минесота, ваквиот хибрид е потомок на домашно куче и волк кои се пареле. „Овие два вида се меѓуплодни, што значи дека можат да се вкрстуваат и да дадат одржливо потомство“, наведува Центарот на својата веб-страница.

Ваквиот број на животни во САД е голем, а дали тие се добри домашни миленици или не е предмет на многу спорови. Малку луѓе успешно чуваат хибриди како домашни миленици, според Меѓународниот центар за волци, а колку е поголем процентот на гени на волкот кај животното, толку е помала веројатноста да се чува како домашно милениче.

Илјадници од нив се напуштаат во САД секоја година бидејќи луѓето купуваат животно за кое не се подготвени да се грижат. Од Меѓународниот центар за волци велат дека поседувањето хибрид волк-куче како домашно милениче може да биде предизвик поради нивното сложено и непредвидливо однесување.

Сепак, повеќето американски држави имаат свои закони кои го регулираат одгледувањето и сопственоста на таквите животни, кои понекогаш се разликуваат по окрузи. Неколку држави, како што се Илиноис, Мичиген и Њујорк, ги забранија хибридите волк-куче како домашни миленици.