Капитенот на фудбалската репрезентација на Англија, Хари Кејн во пресрет на вечерашната дерби пресметка со Италија во Лигата на нации (20.45 ч.) направи лапсус и на новинарите им порача дека „аѕурите“ се еден од фаворитите за титулата на Светското првенство во Катар што ќе се игра во ноември и декември годинава.

Запрашан за тоа кои селекции се меѓу најголемите фаворити за титулата на СП, Кејн со својот одговор ги насмеа фановите и новинарите.

– Има доста силни репрезентации. Тука се некои топ селекции од Европа, како ние, па Германија, Франција, Шпанија и Италија, а потоа ги имате и Бразил и Аргентина – изјави Кејн.

Селекцијата на Италија иако е актуелен европски шампион, нема да игра на претстојниот Мундијал во Катар и тоа по заслуга на Македонија и на Александар Трајковски.

Македонија во поуфиналето од баражот за пласман на СП во Катар, во Палермо ја совлада Италија и тоа со голот на Трајковски во 92 минута.